Претседателските и парламентарните избори се закажани најдоцна за средината на јуни оваа година, но според Ердоган тие би можеле да се одржат и порано. Анкетите покажуваат дека тој и неговата партија АКП би можеле да ги изгубат изборите по 20 години поминати на власт
Турските власти на чело со претседателот на земјата, Реџеп Таип Ердоган, сè поагресивно се справуваат со неистомислениците и политичките противници пред изборите користејќи цензура и затворски казни, објави денеска организацијата „Хјуман рајтс воч“ (Human Rights Watch), јавуваат агенциите.
Претседателските и парламентарните избори се закажани најдоцна за средината на јуни оваа година, но според Ердоган тие би можеле да се одржат и порано. Анкетите покажуваат дека тој и неговата партија АКП би можеле да ги изгубат изборите по 20 години поминати на власт.
Во својот годишен извештај, групата за човекови права ХРВ рече дека властите користат закони за цензура на социјалните медиуми и дезинформации за да ги замолчат независните медиуми, опозицијата и воопшто критичарите на власта на Ердоган.
„Владата спроведува многу остра и навредлива политика против политичката опозиција, целосно забранува јавни протести, ги затвора и ги гони бранителите на човековите права и оние за кои смета дека се критичари, а судовите постапуваат по политички наредби“,
вели Хју Вилијамсон, директор на ХРВ за Европа и Централна Азија.
Дирекцијата за комуникации на турската влада досега не се огласи со коментар на наводите во извештајот, наведуваат светските новински агенции.
Како еден од поочигледните примери за ваквиот однос на турските власти кон опозицијата и неистомислениците, се наведува случајот со градоначалникот на Истанбул, Екрем Имамоглу, кого судот минатиот месец го осуди на две години и седум месеци затвор и му забрани да учествува во политиката под обвинение за навреда на јавни службеници во 2019 година.
Инаку, Имамоглу важи за потенцијален противкандидат на Ердоган за претседател на државата од главната опозициска Републиканска народна партија (ЦХП).
Овој месец Врховниот суд на Турција ги замрзна банкарските сметки на прокурдската Демократска партија на народите (ХДП), третата по големина партија во парламентот поради наводни врски со милитанти. Оваа партија ги негира овие обвинувања.
Во октомври минатата година Турција усвои закон предложен од АКП со кој на новинарите и корисниците на социјалните мрежи им се заканува затворска казна до три години за ширење дезинформации, потег што предизвикува длабока загриженост за слободата на говорот во земјата.
Владата на Турција, пак, од друга страна ги негира тврдења дека судовите во последниве години презеле остри мерки против неистомислениците и дека ги замолчувале противниците.
Од владата излегоа со тврдења дека новиот закон има за цел да ги регулира онлајн публикациите, да ја заштити земјата и да се бори против дезинформациите.
Извор: 360stepeni.mk
