Последните денови, вели амбасадорот во интервју за Гласот на Америка, има намалување на тензиите на северот на Косово, претежно од српска страна, додавајќи оти е многу важно и косовската страна да направи чекор во таа насока
Мислам дека имаме суштински проблеми со премиерот на Косово Албин Курти и прашање е дали Соединетите Американски Држави можат да сметаат на него како на партнер, вели американскиот амбасадор во Србија Кристофер Хил во интервју за Гласот на Америка.
Тој вели оти не се сеќава на толку длабоки поделби меѓу Приштина и Вашингтон, пренесува регионалниот сервис на Радио Слободна Европа (РСЕ).
Американскиот амбасадор оценува дека Србија покажала конструктивен и партнерски однос во врска со деескалацијата на актуелната криза на северот на Косово, но дека од неа сепак се очекува да ги признае косовските документи и да не го спречува членството на Приштина во меѓународните организации.
Интервјуто на Хил следува откако неделава американскиот заменик-помошник државен секретар Габриел Ескобар и специјалниот пратеник на ЕУ за дијалог меѓу Србија и Косово Мирослав Лајчак презентираа предлози до Белград и Приштина за деескалација на тензиите на северот на Косово, нови избори на кои ќе учествуваат и Србите и враќање на дијалогот за нормализација.
„Мислам дека имаме проблем со господинот Курти, кој не покажува волја да го прифати тоа. Ми се чини дека имаме некои суштински проблеми со него, дали можеме да сметаме на него како на партнер. Но, таа одлука ќе и ја препуштам на нашата (американската) амбасада во Приштина“,
вели Хил.
Во Лепосавиќ, Звечан и Зубин Поток, општини на северот на Косово каде живеат мнозинство Срби, тензиите ескалираа на 26 мај, кога градоначалниците Албанци со помош на косовската полиција ги презедоа функциите во општинските згради, потег кој наиде на жесток отпор кај локалното население.
Србите во овие три општини од тогаш секојднево организраат протести пред општинските згради, а на 29 мај тие се судрија со припадници на мисијата на НАТО на Косово – КФОР. Во инциднетите беа повредени десетици од двете страни.
Последните денови, вели амбасадорот на САД во Белград, има намалување на тензиите на северот на Косово, додавајќи дека е многу важно косовската страна да направи чекор во таа насока.
„Има деескалација, секако на српска страна, а очекувањата на Европската Унија и на САД се дека Косово ќе направи чекор во таа насока. Многу е важно специјалната полиција да се повлече од општинските згради. Исто така, градоначалниците треба да ги напуштат општинските згради, а тоа мора да се случи кога- тогаш.. И третото, малку потешко прашање, дали можете да одите на нови избори“,
вели Хил.
Тој посочува дека српската страна јасно ставила до знаење дека е важно формирањето на Заедницата на општини со српско мнозинство. Сепак, вели Хил тоа „сè уште претставува проблем“ за премиерот на Косово, иако „сите други разбираат дека тоа е неопходно“.
Косовскиот премиер Албин Курти се изјасни за одржување нови избори во четири општини на север – Лепосавиќ, Звечан, Зубин Поток, Северна Митровица – и за намалување на присуството на полицијата. Но, за тоа побара, како што рече, „српските криминални банди“ или да си заминат или да бидат уапсени.
Косовскиот премиер рече и дека новите избори треба да бидат „демократски и фер“ и дека треба да има слободна изборна кампања. Сепак, тој се пожали дека Ескобар и Лајчак доаѓаат во Приштина „со барањата на другата страна“.
Специјалниот пратеник на САД за Западен Балкан, Ескобар, на 7 јуни повтори дека мора да се формира Заедница на општини со српско мнозинство и дека „единствено прашање е дали тоа ќе се случи со оваа или со друга влада на Косово“.
Заедницата на општините со српско мнозинство беше договорена во 2013 година како дел од дијалогот меѓу Косово и Србија за нормализација на односите.
И покрај бројните повици на меѓународната заедница за спроведување на тој договор, Косово категорично одбива со образложение дека Заедницата ќе има широки овластувања, што ќе ја загрози внатрешната функционалност на земјата.
Извор: 360stepeni.mk
