Според анкетата направена од Австриското друштво за европска политика, дури 41 отсто од испитаниците одговориле негативно на прашањето дали се согласуваат С Македонија да стане член на Европската Унија. Позитвино одговориле само 21 отсто од испитаниците. Најголема поддршка за влез во Европска Унија меѓу австриските граѓани ужива Босна и Херцеговина, односно 29 отсто, додека, пак, најмала поддршка има Турција, земја за која дури 81 отсто од испитаниците одговориле дека е непожелна во Унијата
Австријците и понатаму се скептични за евентуално идно проширување на Европската Унија. Според истражувањето на Австриското друштво за европски политики, кое е спроведено во април годинава, ниту еден потенцијален кандидат за членство не добил поддршка од мнозинството граѓани. Австријците се поделени и во мислењата дали Бугарија и Романија треба да станат дел од Шенген-зоната.
Најголема поддршка за влез ужива Босна и Херцеговина со поддршка од 29% од испитаниците. Поддршката за Србија, Црна Гора, Албанија и С Македонија варира од 24% до 21%, додека, пак, зелено светло за Косово би дале само 16% од граѓаните. Од друга страна, пак, 41% од Австријците се против влезот на Босна и Херцеговина, против влезот на С Македонија се исто така 41%, против влезот на Србија 48%, а против влезот на Косово 53%. Најголема „одбивност“ граѓаните на Австрија имаат кон влезот на Турција во ЕУ.
Споредено со претходната анкета спроведена во јули 2022 г., се зголемила поддршката за влез на Србија и Албанија во ЕУ за 8 отсто, на БиХ за 5 отсто и Турција за 3%. Според анкетата, за граѓаните на Австрија, во Унијата не се добредојдени ниту Украина ниту Грузија и Молдавија.
Од друга страна, мнозинството во Австрија е и против влезот на Бугарија и Романија во Шенген-зоната. 38% изјавиле дека се за влезот на Бугарија, додека пак со не одговориле 42%. За Романија бројките се речиси слични, 36% од Австријците се за влезот на Романија во Шенген, додека пак со не одговориле 44% од испитаниците.
Извор: 360stepeni.mk
