Градоначалникот на општина Бутел, Дарко Костовски, заедно со неговиот тим, направија важен чекор кон активно вклучување на граѓаните во креирањето на буџетот на општината за 2025 година.
Организирани екипи на општината од денеска почнаа да посетуваат голем број домаќинства во населените места во Бутел, со цел да се соберат што повеќе идеи и предлози кои ги одразуваат реалните потреби на граѓаните.
„Заедно со граѓаните ја градиме иднината на општина Бутел! Општина Бутел и годинава креира буџет заедно со граѓаните. Од денеска екипи организирани од општина Бутел ќе посетат голем број домаќинства во сите наши населени места. Овие тимови ќе собираат предлози и идеи за новиот буџет“, напиша градоначалникот на Бутел, Дарко Костовски на својата официјална Фејсбук страница.
Костовски ги информираше жителите на Бутел дека за повеќе можности за комуникација, граѓаните ќе можат да ги испратат своите предлози до архивата на општина Бутел, на електронската адреса: [email protected] или на телефонскиот број: 075 274 421
Според градоначалникот на општина Бутел, оваа иницијатива има за цел да создаде буџет кој ќе ги одразува барањата и решенијата што ги предлагаат самите граѓани, зацврстувајќи ја врската меѓу нив и локалната власт.
Општина Бутел останува посветена на стабилна, модерна и просперитетна иднина градејќи заедно со граѓаните европска општина.
