Актуелниот црногорски претседател вели дека е задоволен од резултатот во првиот круг, дека го добил очекуваниот број гласови и дека препознава одреден резервоар гласови што не бил активиран денеска, со кој ќе работи за да се мобилизира за вториот круг
Противкандидатот на Ѓукановиќ во вториот круг, Јаков Милатовиќ, вечерва доби поддршка од третопласираниот во првиот круг, Андрија Мандиќ, што математички го прави фаворит пред гласањето на 2 април
Актуелниот претседател на Црна Гора и победник во првиот круг, Мило Ѓукановиќ, е задоволен од резултатот од денешното гласање, а во пресрет на вториот круг од изборите за шеф на државата најавува активирање на дополнителен број гласачи за кој тврди дека знае каде е.
Тој смета дека Црна Гора денеска го покажала демократскиот капацитет, дека изборите се одвивале во мирна атмосфера, во која граѓаните слободно ја изразиле својата волја. Според него, тоа значи дека расте демократската култура во Црна Гора, што е артикулација на неговите политики и приближување до конечната цел – квалитетен живот на граѓаните во Црна Гора како на оние во Европската Унија.
„Го остваривме тоа што сакавме. Ова е точно тоа што го планиравме и што го покажаа јавните анкети. Освоив 36 отсто од гласовите, тоа е над 120 илјади гласа и го сметам за вреден резултат, кој потполно ме исполнува со задоволство. Ова е сериозна предност во однос на противкандидатот со кого ќе се натпреварувам во вториот круг, но ова не е само оптимизам, туку и јасно препознавање на одредени резервоари гласачка поддршка кои не се активирани во првиот круг. Некако го минимизиравме активирањето на сите потенцијали на поддршка. Апсолутно знаеме каде е поддршката во вториот круг и во следните 14 дена ќе работиме за нејзино активирање и наш конечен триумф“,
кажа Ѓукановиќ вечерва.
Тој смета дека денешните резултати потврдиле уште нешто – дека на Црна Гора ѝ требаат избори, алудирајќи на парламентарни кои веќе ги закажа за 11 јуни.
„Резултатите на овие избори, не само моите туку и на противкандидатите кои се залагаат за брза организација на избори, покажуваат дека гласачкото тело е расположено во следните месеци да се случат и најважните избори – парламентарните и да ја извадиме Црна Гора од кризата во која се наоѓа. Овој исход од првиот круг е одличен ветер во грб на скорашните парламентарни избори да добиеме влада, која ќе продолжи да ја води Црна Гора по европскиот пат“,
кажа Ѓукановиќ.
Проекцијата на резултатите од денешниот прв круг што го прави Центарот за мониторинг и истражување (ЦЕМИ), а врз основа на обработени 99,7 отсто од нивниот примерок, покажува дека Ѓукановиќ освоил 35,3 % од гласовите, додека втор е Јаков Милатовиќ со 29,2 отсто.
Лидерот на Демократскиот фронт и кандидат на претседателските избори, Андрија Мандиќ, уште вечерва излезе со поддршка за второпласираниот по денешното гласање – заменик-претседателот на движењето Европа сега. Милатовиќ доби поддршка и од Јован Радуловиќ, а најверојатно ќе ја добие и од четвртопласираниот Алекса Бечиќ, што математички го прави фаворит во вториот круг.
ИЗВОР: 360stepeni.mk
