БЕРЛИН (АА) – Популарниот чет-бот за вештачка интелигенција, „ChatGPT“, би можел привремено да биде блокиран во Германија поради загриженоста за приватноста, изјави комесарот за заштита на податоците во земјата, пренесува Анадолу.
Улрих Келбер, федерален комесар за заштита на податоците, изјави за деловниот весник „Handelsblatt“ дека Германија може да ја следи Италија во блокирањето на „ChatGPT“ доколку е потребно.
„Во принцип, слична постапка е можна и во Германија“, рече тој. Според него, прашањето е во надлежност на органите за заштита на податоците во сојузните држави.
Германските власти веќе контактирале со своите италијански колеги за да добијат дополнителни информации за привремената забрана, јавуваат локалните медиуми.
Во меѓувреме, германското Федерално министерство за дигитализација и транспорт предупреди на општа забрана за чет-ботот „ChatGPT“.
„Не ни треба забрана за апликации за вештачка интелигенција, она што ни треба е да најдеме начини да обезбедиме вредности, како што се демократијата и транспарентноста“, рече портпаролот на Министерството.
Италијанската Агенција за заштита на приватноста минатата недела ја блокираше алатката за пишување на вештачката интелигенција на „OpenAI“ со седиште во САД, „ChatGPT“, обвинувајќи ја за незаконско собирање лични податоци на корисниците.
Италијанските власти соопштија дека OpenAI не им обезбедил доволно информации на корисниците за употребата на нивните лични податоци.
Некои корисници на „ChatGPT“ виделе и информации од туѓи профили, според медиумите.
Извор: www.aa.com.tr
