Во авионот на компанијата „Јети ерлајнс“, кој летал од Катманду до туристичкиот град Покара, имало вкупно 72 лица. Тој, како што соопштиле локалните власти, се урнал при слетувањето, а потоа се запалил
Најмалку 40 луѓе загинаа, откако авион се урна во близина на аеродром во централниот дел на Непал, соопштија тамошните власти, пренесува Би-би-си.
Во авионот на компанијата „Јети ерлајнс“, кој летал од Катманду до туристичкиот град Покара, имало вкупно 72 лица.
Тој, како што соопштиле локалните власти, се урнал при слетувањето, а потоа се запалил.
На видеo-снимка објавена на социјалните мрежи се гледа како авионот лета ниско над населено место пред да направи нагло свртување.
Video of what seems to be moments before the crash of Yeti Airlines🇳🇵 ATR72 carrying 72 passengers near Pokhara Airport#aerowanderer #aviation #avgeek #nepal #yetiairlines pic.twitter.com/hk12Edlvpf
— Aerowanderer (@aerowanderer) January 15, 2023
Како што пренесува Би-би-си во авионот имало 68 патници, од кои најмалку 15 странски државјани и четворица членови на екипажот.
Стотици непалски војници се вклучени во операцијата за спасување на местото на несреќата, кое се наоѓа во клисурата на реката Сети, на само еден и пол километар од аеродромот.
На видеото снимено на местото каде паднал авионот се гледа густ црн чад и запален отпад.
„Очекуваме да извлечеме уште тела“,
изјави портпаролот на армијата за Ројтерс, велејќи дека авионот „се распаднал на парчиња“.
Премиерот на Непал, Пушпа Камал Дахал свика итен состанок на неговиот кабинет и ги повика државните агенции да се вклучат во спасувачките операции.
Од патниците, се вели дека 53 се Непалци. Во авионот имало пет Индијци, четворица Руси и двајца Корејци. Имало и по еден патник од Ирска, Австралија, Аргентина и Франција.
Воздухопловните несреќи не се невообичаени во Непал, а причина се оддалечените писти и ненадејните временски промени кои можат да предизвикаат опасни услови за летање, наведуваат медиумите.
Авион на „Тара Ер“ се урна во мај 2022 година во северниот непалски округ Мустанг, при што загинаа 22 лица.
На почетокот на 2018 година, 51 лице загина кога авион кој сообраќаше од Дака во Бангладеш се запали при слетувањето во Катманду.
Извор: 360stepeni.mk
