Од денеска па натаму, вели пратеничката, ако највисоката италијанска институција им дозволува на вработените да дојат на своите работни места, тогаш на ниту една друга жена, во која било професија, не може да ѝ се одземе тоа право
Пратеничката во италијанскиот парламент Гилда Спортијело, која се бореше на жените да им биде дозволено да дојат бебе за време на седница, стана првата која го направи тоа.
Таа го доеше нејзиниот двомесечен син вчера на седница во парламентот на Италија додека траеше гласањето за еден од законите од дневниот ред. За тоа, добила аплауз од присутните во салата.
Како што потсетува „Асошиејтед прес“, во претходниот парламентарен состав таа се залагаше да се усвои правилник според кој ќе им се овозможи на пратеничките да учествуваат во гласање и дебати додека дојат бебиња кои се помали од една година.
И таа и таткото на бебето, Рикардо Рикарди, се пратеници од редовите на популистичкото Движење Пет ѕвезди.
Весникот „Република“ пренесува дека Спортијело рекла оти се надева дека нејзиниот пионерски чекор ќе ги инспирира работодавците во Италија да им овозможат на вработените мајки ако сакаат, да ги дојдат своите бебиња на работното место.
Од денеска па натаму, вели пратеничката, ако највисоката италијанска институција им дозволува на вработените да дојат на своите работни места, тогаш на ниту една друга жена, во која било професија, не може да ѝ се одземе тоа право.
Извор: 360stepeni.mk
