(ФОТО) И САД ќе испратат тенкови во Украина

Бајден потенцираше дека помошта е наменета да ѝ се помогне на Украина и да ја одбрани својата земја, а не е офанзивна закана за Русија

Откако Германија одлучи да испрати 14 тенка „леопартд“ за Украина, на ваков чекор се решија и САД. Американскиот претседател Џо Бајден денеска на прес-конференција најави дека ќе испратат 31 тенк „абрамс“ што, рече, е еквивалент на еден украинскиот баталјон.

„Министерот за одбрана Лојд Остин го препорача овој чекор бидејќи со тоа ќе се зајакне капацитетот на Украина да ја брани својата територија и да постигне стратешки цели“,

рече Бајден.

Тој кажа дека пред да се донесе одлуката, утрово за поддршка на Украина разговарал со германскиот канцелар Олаф Шолц, францускиот претседател Емануел Макрон, британскиот премиер Риши Сунак и италијанската премиерка Џорџа Мелони.

Тенковите „абрамс“, како што посочи американскиот претседател, се најспособните тенкови во светот, но и исклучително сложени за ракување и одржување.

„На Украина и ги даваме деловите и опремата неопходни за ефикасно одржување на овие тенкови на бојното поле“,

рече Бајден.

За нивна испорака ќе биде потребно време, како што посочи, но нагласи оти САД ќе се погрижат украинските сили да бидат целосно подготвени да управуваат со тенковите.

Бајден потенцираше дека помошта е наменета да ѝ се помогне на Украина и да ја одбрани својата земја, а не е закана за Русија.

„Нема офанзивна закана за Русија. Доколку војниците се вратат во Русија, оваа војна би завршила уште денеска“,

рече Бајден.

Путин, посочи тој, очекувал поддршката на САД за Украина да опаѓа, но погреши.