Од Канцеларијата за Косово и Метохија ја прозиваат меѓународната заедница да го погледне момчето во очи и да му објасни зошто е нападнат порачувајќи дека овој настан не смее да се релативизира
Малолетник на возраст од 15 години, со српска националност, Лазар М., бил претепан од четири повозрасни Албанци во етнички мешаната населба Сув Дол, објави српската Канцеларија за Косово и Метохија.
„Тој тргнал утрово пешки, кога од автомобил во движење, почнале да му дофрлаат на албански. Детето ја наведнало главата што било знак за албанските екстремисти дека не го разбира јазикот и дека станува збор за Србин, па потоа го запреле возилото и го претепале“,
пишува во соопштението од српската Канцеларија.
Момчето утрово во придружба на неговиот татко дошло во Клиничката болница во Косовска Митровица со видни повреди на главата, хематоми и гребаници, како и со модринка под окото, а според неговите зборови напаѓачите му задале повеќе удари и во пределот на градниот кош и стомакот.
Лекарите му направиле комплетна дијагностика и го пуштиле на домашно лекување.
Во соопштението се наведува и дека директорот на Канцеларијата за Косово и Метохија, Петар Петковиќ, разговарал со таткото на повреденото момче, му пружил поддршка и ја понудил сета потребна помош.
„По нападот на српските момчиња во Штрпац и Клоток, уште едно српско дете се најде на мета на албанските хулигани и екстремисти. До нападот дојде на место каде се стационирани припадници на косовската полиција на Курти поради наводна ’загрозеност на Албанците‘ во етнички мешаните средини. Вистината е дека очигледно нивната намера е да ги заштитат хулиганите и екстремистите, неказниво да ги напаѓаат Србите и српските деца. Никој не смее да ја сврти главата од овој напад и целата меѓународна заедница мора да го погледне Лазар во очи да му објасни зошто е нападнат на прагот од неговата куќа. Тука не смее да има место за релативизирање на нападот бидејќи Лазар е нападнат само затоа што е Србин“,
порачуваат од српската Канцеларија за Косово и Метохија.
Извор: 360stepeni.mk
