ИСТАНБУЛ (АА) – Туркије со нетрпение го очекува денот кога „извршителите на масакрот“ во Газа ќе бидат изведени пред лицето на правдата, изјави вчера турскиот министер за надворешни работи Хакан Фидан, известува Анадолу.
„Со нетрпение го чекаме денот кога сторителите на масакрот ќе одговараат пред суд“, напиша Фидан на платформата Х.
Тој додаде дека Анкара ќе продолжи да ги поддржува Палестинците и ќе инсистира оние што стојат зад „масакрот во Газа да бидат кривично гонети“.
„Израелските власти, кои сè уште не го почитуваат меѓународното право и сите хуманитарни вредности, одамна се осудени од светската јавност“, додаде Фидан.
Израел започна брутална воена офанзива врз Појасот Газа со неселективно бомбардирање на цивилни населби, училишта, верски објекти и болници по нападот на палестинската група Хамас на 7 октомври.
Оттогаш во нападите на Израел врз Појасот Газа убиени се повеќе од 34.454 Палестинци, претежно жени и деца, а над 77.575 се повредени во услови на масовно уништување и голем недостиг на неопходни работи.
Израел воведе целосна блокада на Појасот Газа, оставајќи го неговото население, особено жителите на Северна Газа, на раб на глад.
Според податоците на Обединетите нации, израелските напади врз палестинската енклава принудија 85 отсто од населението на Појасот Газа внатрешно да се раселат, предизвика акутен недостиг на храна, чиста вода и лекови, а 60 отсто од инфраструктурата на енклавата се оштетени или уништени.
Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните акти и да преземе мерки за да обезбеди хуманитарна помош за цивилите во Газа.
И покрај тоа, израелските напади врз Појасот Газа продолжуваат со несмален интензитет, а испораката на хуманитарна помош не е доволна за решавање на хуманитарната катастрофа.
Извор: Anadolu Agency (AA)
