Покрај кај Пенс, доверливи документи беа пронајдени и кај Бајден и Трамп за што специјални обвинители, исто така, водат истрага
Специјалниот обвинител кој ја води истрагата за обидот на поранешниот американски претседател Доналд Трамп да ги поништи резултати од изборите во 2020 година, го повика како сведок потпретседателот на САД во мандатот на Трамп, Мајк Пенс, објави агенцијата „Асошиејтед прес“.
Во меѓувреме, со согласност на Пенс, ФБИ извршил претрес во неговата куќа во рамки на одвоена истрага за доверливи документи кои беа најдени во неговата резиденција во Индијанаполис.
Претресот следува само неколку недели откако адвокатот на Пенс го извести Националниот архив, кој е задолжен за чување на документите. Документите со ознака „доверливо“ потоа беа предадени на ФБИ.
Адвокатот на Пенс во јануари соопшти дека станува збор за мал број документи кои „случајно биле спакувани и пратени“ на адресата на поранешниот потпретседател при крајот на мандатот на администрацијата на Трамп.
За претресот кој беше спроведен сега од ФБИ, дел од медиумите објавија дека по темелното пребарување биле пронајдени и дополнителни документи.
Истрагата и претресот кај Пенс се во период кога специјални обвинители водат истраги за доверливи документи кои беа пронајдени и во куќата и поранешната канцеларија на актуелниот претседател Џо Бајден, како и во резиденцијата на Трамп на Флорида.
Извор: 360stepeni.mk
