БРИСЕЛ (АА) – Европската Унија (ЕУ) го поздрави новиот прекин на огнот во Газа и побара отворање премини за да се овозможи хуманитарна помош, гориво и работници во регионот, пренесува Анадолу.
„Европската Унија го поздравува најавениот прекин на огнот меѓу Израел и палестинското движење Исламски џихад, кој треба да стави крај на насилството во и околу Газа“, се вели во соопштението на дипломатската служба на ЕУ.
Унијата изрази длабоко жалење за загубите на цивилни животи, вклучително и деца, и ја истакна важноста „повторно да се отворат премините за да се овозможи особено хуманитарна помош и гориво, како и работници, да влезат и да излезат од Газа“.
ЕУ, исто така, ги пофали напорите за посредување на Египет за склучување на примирјето и ги повика двете страни да работат на трајно политичко решение.
Израел и палестинските групи во Газа во саботата се договорија за прекин на огнот со посредство на Египет, кој треба да стапи на сила во 21 часот.
Најмалку 33 Палестинци се убиени, а десетици се повредени во израелските воздушни напади врз Газа од вторникот, според палестинското Министерство за здравство.
Израелската армија започна воздушни напади како дел од контраофанзивата откако беа истрелани ракети од Газа по смртта на палестински затвореник што штрајкуваше со глад во израелски затвор.
Палестинските фракции во Газа возвратија со лансирање ракети врз израелските територии.
Извор: www.aa.com.tr
