Ескобар нагласи дека со организација на средбата во Охрид, Северна Македонија докажала дека е доверлив партнер на САД и ЕУ
Без нашите пријатели и сојузници ова немаше да се случи. Ова е уште еден доказ дека Северна Македонија е доверлив партнер што им помага на САД и ЕУ да постигнат регионална стабилност, изјави вечерва во Охрид, американскиот преставник за Западен Балкан, Габриал Ескобар по завршување на дијалогот меѓу Белград и Приштина со посредство на ЕУ, заблагодарувајќи му се премиерот Димитар Ковачевски и на Владата за организацијата на средбата.
Тој ги поздрави и Белград и Приштина за, како што рече, постигнатиот тежок, но неопходен договор за воспоставување на мирољубиви и предвидливи односи меѓу двете страни.
„Тоа не само што ги отвора вратите за евроатланска интеграција на двете земји, туку ја отвора и вратата на регионот за нова ера на мир“,
рече Ескобар.
Американскиот дипломат им се заблагодари и на претставниците на ЕУ за, како што рече, нивната напорна работа за постигнување на овој визионерски момент.
„Можам да ви кажам дека САД ќе се заложат да помогнат во спроведување (на договореното) и тоа спроведување да биде во интерес на двете земји и на регионот. Ќе сториме се што е во наша моќ за да ја поддржиме имплементацијата, и на политички, и на економски и на секој друг начин, за да направиме мирот на Балканот да биде реалност“,
потенцира Ескобар.
Во вилата „Билјана“ во Охрид по долги 12 часа преговори меѓу високиот претставник за надворешна и безбедносна политика на ЕУ Жозеп Борел, специјалниот претставник Мирослав Лајчак и српскиот претседател Александар Вучиќ и косовскиот премиер Албин Курти, како што беше објавено, беше постигнат договор за анексот за имплементација на договорот помеѓу двете земји за норнмализирање на нивните односи.
Извор: 360stepeni.mk
