АНКАРА (АА) – Претседателот на Туркије, Реџеп Таип Ердоган, во интервју за „Си-ен-ен интернешнал“ (CNN International) изрази уверување дека турскиот народ и во вториот круг од изборите, кои ќе се одржат на 28 мај, ќе ја покаже силната турска демократија, пренесува Анадолу.
Ердоган во интервјуто одговараше на прашањата на новинарката Беки Андерсон, и говореше за различни теми, од изборниот процес до надворешната политика.
На прашањето: „Во изминатите 20 година лесно победувавте на сите избори на кои учествувавте, и постигнавте рекорди на изборите. Во историјата на Туркије за прв пат се оди на втор круг од изборите. Колку мирно се чувствувате моментално?“, Ердоган одговори:
„Верувам дека на изборите кои ќе се одржат наредната недела, мојот народ ќе ја покаже силата на турската демократија. (Во првиот круг) Имавме излезност која достигна до 90 отсто. Оваа стапка на излезност е многу важна. Тоа е невидена излезност во светски рамки. Се надевам дека и на овие избори мојот народ нема да нè изневери.“
На потсетувањето од новинарката за осудата на Ердоган откако „американскиот претседател Џо Бајден за време на изборната кампања го опиша него како автократ“, турскиот претседател одговори:
„Зар може еден човек кој оди во втор круг, а не во прв, да биде диктатор? Сега вистината е ова. Народната алијанса со 322 пратеници ќе влезе во Парламентот, и човекот кој се наоѓа на нејзино чело ќе оди во втор круг. Каква диктатура е тоа?“, рече Ердоган.
Запрашан „Ако повторно бидете избрани, дали ќе соработувате со администрацијата на Бајден?“, Ердоган одговори: „Нема сомнение во тоа. Јас ќе работам и со господин Бајден, ќе работам и со кој и да го замени.“
Ердоган беше потсетен и на неговите изјави дека „Западот повеќе следи една политика врз основа на провокација“ и дека не се согласува со ставот на Западот против Русија во врска со украинското прашање, и беше запрашан: „Дали испраќањето голема воена и финансиска помош во Украина е провокација? Дали Западот греши тука?“.
„Моментално Западот не покажа балансиран пристап во оваа насока. Значи, избалансиран пристап кон земја како Русија, би бил многу попрецизен. Како јас што ги развивам моите односи со господин Путин, истото требаше да го направи и Западот. Бидејќи во светот имаме потреба едни од други. Како јас се состанувам со секоја земја од Западот, на тој начин се состанувам и со господин Путин. Исто така, на пример, што се однесува до житниот коридор низ Црното Море, ние ги исполнуваме потребите не само на Западот, туку и на африканските земји. Видете, процесот во врска со житото заклучно со 18 мај го продолживме за уште 2 месеца. Како се случи таа работа? Тоа се случи благодарение на овие посебни односи со господинот Путин“, одговори Ердоган.
Инаку, целото интервју на Ердоган за „Си-ен-ен интернешнал“ ќе се емитува во текот на денот.
Извор: www.aa.com.tr
