Ердоган по посетата на Албанија и Србија: Туркије има длабоки историски и политички врски со балканските држави

October 12, 2024
2 mins read

АНКАРА (АА) – Турскиот претседател Реџеп Таип Ердоган изјави дека Туркије е подготвена да го направи својот дел во осигурувањето на трајната стабилност и мирот на Балканот, јавува Анадолу.

Ердоган по официјалните посети на Албанија и Србија, разговараше со новинарите во авионот, велејќи дека средбите биле исклучително продуктивни и успешни.

Тој потсети дека за време на посетата на Албанија се сретнал со претседателот Бајрам Бегај и премиерот Еди Рама, дека потпишале неколку договори за соработка и ја отвориле џамијата Намазѓа, најголемата на Балканот.

Додаде дека со премиерот Рама детално разговарал за прашањата поврзани со соработката во областа на одбранбената индустрија.

Ердоган потсети дека вчера се одржа четвртиот состанок на Советот за соработка на високо ниво во Белград, на покана на претседателот на Србија, Александар Вучиќ.

„Во оваа прилика ја потврдивме одлучноста за понатамошно развивање на постоечката соработка со Србија во сите области. Потпишавме 11 договори кои дополнително ќе ги продлабочат нашите односи. Разговаравме за чекорите кои треба да се преземат за да се постигне целта за трговска размена од пет милијарди долари“, рече Ердоган.

Истакна дека односите меѓу двете земји секој ден се сѐ посилни и поинтензивни.

„Србија само минатата година ја посетија повеќе од 200 илјади наши граѓани, а драго ни е што нашата земја ја посетија и речиси 400 илјади граѓани на Србија. Нашата цел е дополнително да го зголемиме бројот на туристи од двете страни со можност за патување со лична карта, на што веќе работиме“, рече Ердоган.

– Важноста на тристраниот механизам за соработка –

Турскиот претседател истакна дека се разговарало и за други важни прашања од регионот на Балканот.

„Уште еднаш ја истакнавме нашата поддршка за процесот на дијалог меѓу Белград и Приштина. Истакнав дека сме подготвени да го направиме својот дел во осигурувањето на трајната стабилност и мирот на Балканот. Во тој контекст, исто така, го потврдив значењето што го придаваме на механизмот за трипартитна соработка на Туркије, Босна и Херцеговина и Србија“, рече Ердоган.

Порача дека посетата на земјите од балканскиот регион покажува дека официјална Анкара има своја улога во спречувањето на тензиите во тој регион.

„Етничките тензии на Балканот претставуваат многу сложена слика во однос на историската и политичката динамика. Туркије има длабоки историски, културни и политички врски со балканските држави. Овие врски бараат од Туркије да игра поактивна улога во осигурувањето на мирот и стабилноста во регионот“, рече Ердоган.

– Случувањата на Блискиот Исток –

Турскиот претседател потоа одговараше на новинарски прашања за случувањата на Блискиот Исток, особено во Газа и Либан.

Тој истакна дека Израел е „најдиректна закана за регионалниот и глобалниот мир“.

„Оние кои имаат должност да го зачуваат светскиот мир треба да стават крај на оваа закана. Геноцидот во Газа се спроведува пред сите нас и тоа е еден од историските срамови на човештвото“, рече тој.

Како што нагласи, секој што ќе застане на страната на „ционистичката терористичка организација наречена Израел ќе ги носи трагите на овој срам со генерации“.

„Соништата на Нетанјаху и неговата банда ќе се претворат во кошмар“, истакна турскиот претседател, додавајќи: „Палестина ќе биде слободна, Либан ќе остане слободен“

„Не смееме да ја игнорираме агресијата на Израел. Со нашата разузнавачка агенција ги држиме под контрола чекорите што Израел ги презеде и може да ги преземе против Туркије“, рече на крајот Ердоган.



На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.

Извор: Anadolu Agency (AA)

VERO JUMBO MACEDONIA

EVN MACEDONIA

MARKETING

Претходно

Серхио Рамос се враќа во Реал Мадрид?

Следно

МВР апелира за нови интернет измами: Граѓаните да не споделуваат лични податоци и податоци од платежни картици

Latest from Blog

Да се почитуваат препораките на ИЈЗ кога постои евентуален ризик од загадување на воздухот и од штетни материи

Да се внимава на симптоми како кашлица, отежнато дишење, главоболка или иритација на очите, носот и грлото и секој што ги забележува овие симптоми веднаш да побара медицинска помош. Лицата со респираторни

Битола ќе добие нова енергија – ВМРО-ДПМНЕ ја откри советничката листа!

ВМРО-ДПМНЕ и Коалицијата ја претставија својата советничка листа за Битола, нагласувајќи дека нудат комбинација од континуитет, искуство и свежа енергија за новата голема победа. „Остануваме посветени на Битола, продолжуваме искрено, вредно и
Go toTop