Актуелниот претседател Реџеп Таип Ердоган падна под 50% поддршка по 89,24% обработени гласови, јавува Хабертурк. За еден кандидат да победи во првиот круг од претседателските избори во Турција потребно е да освои мнозинство од оние што гласале денеска. Ако продолжи трендот на мал, но постојан пад на Ердоган при пребројувањето на преостанатите гласови, во Турција ќе следува втор круг кој би требало да се одржи за две недели, односно на 28 мај.
Од 89,24% обработени гласови, во моментот Ердоган има 49,94%, додека неговиот опозициски опонент Кемал Киличдароглу има 44,30% од гласовите. Во апсолутни бројки, станува збор за предност од околу 2,75 милиони гласа во земја во која право на глас имаат околу 64 милиони. Излезеноста на денешното гласање е исклучително висока и се движи околу 88-89%.
По затворањето на гласачките кутии и отпочнувањето на броењето на гласовите, двете страни беа самоуверени во своите шанси за победа и во неколку наврати изјавуваа дека нивниот кандидат е во водство.
Ердоган на Твитер напиша дека со брзањето со објавување на резултатите од изборите се „краде“ волјата на граѓаните и им се заблагодари на граѓаните кои денеска гласаа на изборите.
Извор: 360stepeni.mk
