ИСТАНБУЛ (АА) – Турскиот претседател Реџеп Таип Ердоган денес изјави дека не ја одобрува одлуката на САД да и дозволи на Украина да го користи тактичкиот ракетен систем (ATACMS) против Русија, јавува Анадолу.
„Прво и основно, ние не ја сметаме оваа одлука за правилна ниту, пак, ја одобруваме“, рече Ердоган, говорејќи пред новинарите на враќање од Бразил.
Тој го критикуваше влијанието на таквите акции врз војната помеѓу Русија и Украина, која трае повеќе од 1.000 дена, а започна во февруари 2022 година.
„Бајден направи потег што може да се протолкува како поттикнување војна (меѓу Русија и Украина) и овозможување таа никогаш да не заврши, па дури и да се прошири.“
Тој предупреди дека ескалацијата на тензиите помеѓу Русија и Украина може да има пошироки глобални последици.
„Ова може да ги доведе регионот и светот на раб на голема војна. Менталитетот ‘нека се погрижи иднината за себе’ не оди никаде“, рече турскиот претседател.
Зборувајќи за прашањата за националната безбедност, Ердоган ја потврди посветеноста на Туркије на борбата против тероризмот дома и во странство.
„Туркије е решена да стави крај на прашањето за тероризмот без толеранција кон структурите надвор од границите што претставуваат закана за земјата“, нагласи Ердоган.
Тој, исто така, го повика сирискиот режим да преземе поголема одговорност во борбата против тероризмот, особено во однос на терористичките организации ПКК и ЈПГ.
„Како што правиме напори да го исушиме ова мочуриште, така и сириската администрација треба да се вклучи во слични напори.“
Осврнувајќи се на Сирија, Ердоган повтори дека Туркије е подготвена за новата динамика по повлекувањето на САД.
„Туркије е подготвена за новата ситуација што произлегува од повлекувањето на САД од Сирија и сегашната реалност, а националната безбедност е пред сѐ друго“, вели тој.
Во својата 40-годишна терористичка кампања против Туркије, ПКК, која е ставена на листата на терористички организации од страна на Туркије, САД и Европската Унија, е одговорна за смртта на над 40.000 луѓе, вклучително деца, жени и постари лица.
Ердоган, исто така, се осврна на тековната закана од терористичката организација ФЕТО, која е одговорна за неуспешноот пуч во 2016 година против турската Влада, нагласувајќи ја внимателноста во турските институции.
„Никогаш не може да бидеме самозадоволни во борбата против ФЕТО. Сите наши институции се во состојба на висока готовност против обидите за инфилтрација на ФЕТО“, заклучи тој.
Извор: Anadolu Agency (AA)
