ИСТАНБУЛ (АА)
При уривање на 3. катна станбена зграда во Истанбул, едно лице загина, а осум повредени лица се извлечени под урнатините, известува Анадолу.
Од засега непознати причини се урна 3-катна станбена зграда во подрачјето Кучукчекмеџе, во Истанбул.
По применото известување на местото на настанот се испратени голем број противпожарни единици, екипи на здравството, полицијата и АФАД.
Спасувачките екипи веднаш започнале со акцијата за пребарување и спасување откако биле информирани дека има луѓе затрупани под урнатините и притоа комуницирале со едно лице под урнатините.
– Едно лице загина, едно лице самостојно се извлекло од урнатините
Трикатница во истанбулската населба Кучукчекмеџе се урна утринава во 8:40 часот по локално време. Спасувачките екипи од под урнатините го извлекоа телото на едно починато лице. Седум повредени се извлечени од под унатините, а едно лице само се извлекло од разурнатата зграда.
Меѓу повредените има две лица кои се во животна опасност, вклучувајќи и едно шестмесечно бебе.
Засега не е позната причината за уривањето на зградата која е изградена во 1988 година. На местото на несреќата се наоѓаат надлежни полициски, медицински и спасувачки екипи.
При уривањето на зградата се оштетени и возила кои биле паркирани во близина на зградата, а оштетен е и автобус кој минувал покрај зградата во моментот кога се урнала.
Очевидците изјавија дека пред уривањето немало експлозија или потрес, а моментот на уривањето е снимен од надзорните камери.
Сопственикот на продавница покрај урнатата зграда, Јуксел Агаоглу, изјави дека зградата се урнала додека пиел чај и само забележал како се издига прашината откако зградата ненадејно се срушила на улицата.
„Зградата наеднаш се урна на улицата. Иѝбегав во паника. Се вратив и видов дека е во облак од прашина. Таму видовме еден наш пријател, сметководител. Тој излезе и му помогнавме. Тоа беше цврста зграда, но наеднаш се урна“, рече Агаоглу.
Во тек е истрага за откривање на причините за уривањето на зградата.
Извор: Anadolu Agency (AA)
