Пред точно една година милиони Украинци се разбудија во војна и за нив повеќе ништо не беше исто
Годините негирање на Украина и нејзината сопствена државност од страна на рускиот претседател Владимир Путин, кулминираа со воена агресија на Русија врз украинската територија која започна точно пред една година.
По подот на прорускиот претседател на Украина, Виктор Јанукович, во 2014 година, Путин често обвинуваше дека оваа држава е преземена од екстремисти. Во 2021 година, тој почна да распоредува руски војници блиску до украинската граница, но со месеци негираше дека ќе го нападне својот сосед.
Сепак, на 24 февруари 2022, тој ја објави инвазијата нарекувајќи ја „специјална воена операција“. Милиони Украинци се разбудија во војна и за нив повеќе ништо не беше исто.
Првите експлозии се слушнаа во Киев во 3:27 часот изутрина, а потоа одекнаа и низ други делови од земјата.
Украинскиот претседател Володомир Зеленски првпат се огласи околу 5 наутро потврдувајќи дека неговата земја е мета на ракетни напади од Русија.
Денеска, на годишнината од почетокот на војната, пак, тој се огласи дека ова ќе биде година на победа за Украина. На овој ден минатата година, вели Зеленски, милиони украинци направија избор и избраа отпор и борба.
„24-ти во февруари, милиони од нас направија избор. Не бело знаме, туку сино-жолто знаме. Не бегање, туку соочување со непријателот. Отпор и борба“,
напиша Зеленски на социјалните мрежи.
Изминатата година, оценува тој, беше година на болка, тага, верба и единство. Оваа, пак, вели, ќе биде година на наша непобедливост и година на наша победа.
Извор: 360stepeni.mk
