Доналд Трамп синоќа пристигна во Вашингтон на неговата втора инаугурација како 47. претседател на САД, откако пред четири години замина од престолнината.
Сопругата Меланија и синот Барон, како и ќерката Иванка, нејзиниот сопруг Џаред Кушнер, но и синот Ерик, и неговата сопруга Лара, сите долетаа во Вашингтон, по што Трамп со некои од нив се упати во неговиот голф-клуб во Стерлинг, Вирџинија.
Каролин Левит, претставник на транзицискиот тим Трамп и Џеј Ди Венс, на социјалната мрежа „Х“ (поранешен Твитер) напиша: „Претседателот и првата дама заминаа од Мар-а-Лаго и пристигнааа во Вашингтон, округ Колумбија. Ова е големо патување за успех на нашата земја!“.
Над луксузниот Национален голф-клуб на Трамп во Стерлинг, расположен покрај реката Потомак (на околу 50 километри од Вашингтон) синоќа се спушти магла, но тоа не спречи свечената забава да започне со огномет. На настанот, затворен за јавноста, дојдоа околу 500 гости меѓу кои и технолошки гиганти, пријатели на Трамп од деловниот свет и медиумски ѕвезди.
Настапија Лео Дејс, имитатор на Елвис Пресли, и тенорот Кристофер Макио, кој претходно учествуваше на кампањски настани. Имитаторот на Елвис испеа серенада посветена на новиот претседател и првата дама на САД. На социјалните мрежи беше објавено видео.
Денеска, еден ден пред инаугурацијата, 78-годишниот Трамп ќе одржи митинг со своите поддржувачи во арената „Capital One“ во центарот на Вашингтон. Утре, точно напладне по источноамериканско време, Трамп треба да ја положи заклетвата.
Утре, понеделник, се очекува заладување што ги смени плановите па церемонијата за инаугурација на Трамп. Церемонијата ќе се одржи во внатрешна просторија на ротондата на Капитол. Парадата планирана да оди по Пенсилванија авенија исто така ќе биде преместена во арената.
-Мислам дека донесовме правилна одлука. Сега ќе ни биде многу поудобно, изјави Трамп во телефонско интервју за „Ен-Би-Си њуз“.
Ѕвезди на кантри-музиката како Кери Андервуд, Били Реј Сајрус и Џејсон Алдин, диско-групата Village People, раперот Нели и музичарот Кид Рок – сите се очекува да настапат на церемонијата и настаните околу инаугурацијата.
Треба да се појават и актерот Џон Војт и борачот Хулк Хоган, како и тим од раководители на компании кои го поддржуваат Трамп – извршниот директор на Tesla и Икс, Илон Маск, основачот на Amazon, Џеф Безос, извршниот директор на Meта, Марк Цукерберг, и извршниот директор на TikTok, Шоу Џи Чу.
На булеварот Пенсилванија кој што води кон Белата куќа, службите вчера ги демонтираа металните трибини што требаше да се користат за следење на инаугурацијата ако таа се одржуваше на отворено.
Групи демонстранти вчера наутро излегоа на улиците на Вашингтон. Подоцна, неколку илјади луѓе се собраа во престолнината да изразат протест против инаугурацијата на новоизбраниот претседател. Активисти кои се залагаат за права на жените, правда и други цели, протестираа против политиките кои, според нив, ќе ги загрозат нивните уставни права како последица на вториот мандат на Трамп.
Протестите против инаугурацијата на Трамп овој пат се многу помали отколку порано. Во целата земја беа планирани над 300 слични маршеви. Сепак, реално, бројот на демонстранти вчера беше само неколку илјади.
Извор: 24vesti.mk
