Дојави за поставени бомби денеска добиле Уставниот суд и скопскиот аеродром, МВР провери и утврди дека се лажни

Проверките на антитерористичките единици на МВР покажале дека се работи за лажни пријави

Уставниот суд и Меѓународниот аеродром „Скопје“ денеска на своите електронски адреси добиле пораки со заканувачка содржина за поставена бомба во нивните објекти, информираат попладнево од Министерството за внатрешни работи (МВР).

Сепак, проверките на антитерористичките единици на МВР покажале дека се работи за лажни пријави.

„Од страна на полициските службеници веднаш се преземени соодветни мерки и извршени се детални проверки од тимови за антитерористички проверки и утврдено е дека станува збор за лажни пријави“,

соопштија од МВР.

Последниот пат кога беа испратени заканувачки пораки за поставени бомби беше на 30 декември, кога вакви дојави добија девет училишта во Скопје. По проверките на полицијата, се утврди дека тие се лажни.