Детенце од Украина остави цртеж со порака на сочувство пред Турската амбасада во Вилнус

ВАРШАВА (АА) – Бариш Тантекин, амбасадорот на Туркије во литванскиот главен град Вилнус, за Анадолу изјави дека Литванија е важен пријател и НАТО-сојузник на Туркије од Балтикот.

Истакнувајќи дека добиле голема солидарност и поддршка по земјотресите што се случија во Туркије, Тантекин рече дека голем број луѓе оставаат пораки со сочувство и цвеќе пред турската Амбасада:

„Од првиот ден, нашиот азербејџански амбасадор, нашите пријатели таму, Татарите од Литванија, дојдоа пред нашата Амбасада и оставија пораки со сочувство и цвеќе пред нашиот главен влез. Во Вилнус моментално живеат голем број Украинци. Едно детенце од Украина изработило цртеж со нашето знаме, на кое на турски јазик напишало „сочувство“ и ни го донесе пред Амбасадата.“

Посочувајќи дека во Литванија се спроведуваат голем број кампањи за помош и поддршка на Туркије, Татекин рече: „Донации се собираат во Центарот за исламска култура и образование во Вилнус, Џамијата „Каунас“, Верското здружение во Клајпеда и во магацини за логистика на нашите деловни луѓе овде. Црвениот крст на Литванија започна со кампања за собирање донации.“

– „Сите институции се здружени рака за рака“ –

Нагласувајќи дека литванскиот претседател Гитанас Науседа, премиерката Ингрида Симоните, министерот за надворешни работи, Габриелиус Ландсбергис и многу други официјални лица го пренеле своето сочувство и изразиле поддршка, амбасадорот Тантекин додаде: „И литванските министерства за внатрешни работи и за одбрана, всушност, сите институции се здружени, рака за рака, трудејќи се на Туркије да ѝ испорачаат материјали за поддршка во потрагата и спасувањето.“

Турскиот амбасадор рече дека на 9 февруари со поддршка на „Турк хавајолари“ („Туркиш ерлајнс“) во Туркије бил испратен тим за пребарување и спасување од околу 40 лица од Литванија и 7 тони материјали.

„Целиот персонал на нашата Амбасада во соработка со нашите советници, нашите граѓани, нашите деловни луѓе, претставниците на „Турк хавајолари“, вложуваат максимални напори. Напорната работа и посветеноста на секој од нив е многу важна. На сите наши граѓани кои ги загубија животите во земјотресите им посакуваме Божја милост, а на повредените брзо оздравување. Се надеваме дека и од напорите за потрага и спасување ќе продолжиме да добиваме добри вести кои ќе ја обноват нашата надеж.“

На веб страницата на Anadolu Agency (AA) објавена е само дел од содржината на вестите од Системот на проток на вести (HAS)..