Актерот Благој Веселинов ја игра насловната улога во претставата „Иванов“ од А. П. Чехов, чија премиера е закажана за утре (26 мај) во 20 часот во Македонскиот народен театар (МНТ). Преводот од руски јазик го направи Драгица Најческа, а адаптацијата и режијата се на Зоја Бузалковска.
Драмата „Иванов“ е негово прво поставено дело во театар и ја доставува како драма во четири чина, која ја напишал за десет дена.
Според режисерката, „Иванов“ од Чехов е ретко поставуван на македонските театарски сцени.
„Ова е можеби драма на Антон Павлович во која напрепознатливо се огледува совремието, зашто го третира проблемот на интелектуалецот заробен во светот на распаднат морал и вредности, на апатија и здодевност, на ситни интереси и исмеани илузии – на еден многу директен, остар и бескомпромисен начин и јазик“, стои во нејзината драматуршко-режисерка белешка.
Го прашавме Веселинов, каква е судбината на интелектуалецот во ова време-невреме, а тој вели дека да се биде автентичен е комплицирано, тешко и непривлечно.
„Интелектот повеќе не постои во формата на својата дефиниција. Денес секој е толку интелектуалец колку што му се брзи прстите да може да пребара на ‘Гугл’. Често се доаѓа до едначење и релативизирање со што се губи убавината на поединецот, а од тука и основната смисла зошто би се користел интелектот. Ако воопшто постои ‘интелектуалец’ верувам дека живее во своето невреме“, вели Веселинов за САКАМДАКАЖАМ.МК.
Актерската екипа од претставата изминатите месеци имаше тренинзи за качување на карпи на Матка со алпинисти. (Фото: К. Галевски)
За тоа дали смета дека денеска се слуша гласот на интелектуалецот, актерот вели: „Ако го слушнете гласот на некаков ‘интелектуалец’ може да ве прогласат за луд, секако може и самите да се дијагностицирате со недоветност. Ние сите денес сме спремни да слушнеме некој интелегентен виц..и брзо да им се вратиме на нашите инстант задоволства. ‘Има уши а не слуша’ од каде ви е тоа познато?“, рече глумецот.
Актерската екипа од претставата изминатите месеци имаше тренинзи за качување на карпи на Матка со алпинисти.
„Ваквите искуства не му се туѓи на театарот во светот, но најчесто се развиваат на сосема поинаков драмски материјал. Кај нас нешто вакво се работи за првпат“, ни рече Бузалковска минатиот месец.
„ За мене е прв ваков процес кој во себе содржи 3 и повеќе процеси. ‘Иванов и карпата’ јас се заљубив во идејата од прва, не знаејки каде ќе ме однесе самиот процес. Сега после три месеци качување, имам чувство дека исчезна напорот и скоро и да не користиме отповеќе сила. Довербата која ја градевме и ја градиме како екипа е за мене бесценет мотив за секоја една средба која ја имавме со целиот тим. Работевме на својот ментален развој поминувајќи пречки какви што не се среќаваат во нашето секојдневие. Благодарност до МНТ, режисерката Зоја Бузалковска, до сите колеги и инструкторите по качување за неизмерната посветеност, храброст и истрајност во оваа несекојдневна авантура. Искрено верувам дека секој еден кој е дел од ‘Иванов’ доживеа своја лична позитивна трансформација која се темели на чиста театарска љубов“, рече Веселинов.
Сцена од „Иванов“. (Фото: К. Галевски)
Во претставата играат и: Драгана Костадиновска, Оливер Митковски, Ѓорѓи Јолевски, Звездана Ангеловска, Дарја Ризова, Григор Јовановски, Нина Деан, Александар Ѓорѓиески, Александар Михајловски, Николина Кујача, Ивица Димитријевиќ и Мартин Ѓоргоски.
Сценографијата е на Бузалковска, Илина Ангеловска и Тодор Дајевски, костимите на Роза Трајческа-Ристовска, а музиката на Давид Ангелевски. Репризата е в сабота, 27 мај.
„Иванов“ по 39 години повторно се поставува на сцената на МНТ, каде што Чехов беше застапен и со драмите „Галеб“, „Три сестри“, „Вишновата градина“, „Малиот човек“ и „Вујко Вања“.
Б. НЕСТОРОСКА
ИЗВОР: sdk.mk
