Бериша и другите пратеници ја окупираа собраниската говорница и свиреа за да го спречат секој што ќе се обиде да зборува. Претседателот на собранието беше принуден да ја прекине седницата
Пратениците од опозицијата ја прекинаа денешната седница на албанскиот парламент со свирежи за да го повторат нивното барање за оставка на Владата поради наводна корупција. Во исто време, стотици нивни поддржувачи се обидоа да упаднат во зградата на законодавниот дом. Сепак, полицијата успеа да ги задржи демонстрантите кои фрлаа димни бомби и петарди. Најмалку три лица се приведени во полициска станица по завршувањето на протестот, пренесува „Албанијан дејли њуз“.
Ова се втори протести откако поранешниот премиер Сали Бериша најави дека опозицијата ќе го изразува своето незадоволство преку протести сè додека актуелниот премиер Еди Рама не поднесе оставка. Неколку илјади приврзаници на опозицијата учествуваа на протестите во саботата. Протестите се организирани од Демократската партија на Сали Бериша и левичарската Партија на слободата, на поранешниот претседател Илир Мета.
Бериша и другите пратеници ја окупираа говорницата и свиреа за да го спречат секој што ќе се обиде да зборува. Претседателот на собранието беше принуден да ја прекине седницата, иако не се расправаше за ниту едно од прашањата од дневниот ред.
„Народот ќе зборува“,
рече Бериша по излегувањето од собраниската сала и вети дека протестите ќе продолжат кон крајот на оваа недела, пишува „Индипендент“.
Опозицијата ја обвинува Социјалистичката партија на премиерот Еди Рама за корупција и организиран криминал и го смета премиерот за одговорен за егзодусот на младите Албанци кои заминаа во западноевропските земји да бараат работа. Владата тоа го негира и тврди дека ја одржала инфлацијата на ниско ниво во споредба со другите делови на Европа, односно дека субвенционирала струја за семејствата и малите бизниси.
Извор: 360stepeni.mk
