Дачиќ го известил Попеску дека Србија и Молдавија се пријателски земји и дека секогаш меѓусебно се поддржувале во однос на територијален интегритет
Србија одлучно отфрла каква било инсинуација за потенцијална вмешаност на нејзини граѓани во можни насилни настани во Молдавија, изјави денеска српскиот министер за надворешни работи Ивица Дачиќ во телефонски разговор со молдавскиот министер за надворешни работи Нику Попеску.
Како што се наведува во соопштението од српското Министерство за надворешни работи, во врска со вчерашната изјава на молдавската претседателка Маја Санду дека Москва планира да ја дестабилизира Молдавија со помош на саботери од Русија, Белорусија, Србија и Црна Гора, Дачиќ го известил Попеску дека Србија и Молдавија се пријателски земји и дека секогаш меѓусебно се поддржувале во однос на територијален интегритет.
Дачиќ, се додава во соопштението, изјавил дека Србија затоа бара од молдавските власти да достават какви било информации за претпоставките до нејзините безбедносни служби и дека Белград ги бара сите информации за да спречи некој од Србија да учествува во вооружени и насилни акции насекаде во светот, што е строго казниво според српските закони.
Извор: 360stepeni.mk
