Инцидентот се случил во Горна Савоа на глечерот Амансет на Алпите, во близина на Мон Блан, во југоисточна Франција, денеска околу пладне. Жртвите биле на планинарење кога се случила лавината, а нивниот идентитет сè уште не е утврден
Најмалку четири лица се загинати во лавина на француските Алпи, објави на Твитер министерот за внатрешни работи на земјата, Жералд Дарманин.
Инцидентот се случил во Горна Савоа на глечерот Амансет на Алпите, во близина на Мон Блан, во југоисточна Франција, денеска околу пладне. Жртвите биле на планинарење кога се случила лавината, а нивниот идентитет сè уште не е утврден.
Дарманин рече дека неколку други лица се повредени, а операцијата за пребарување и спасување е во тек.
И тој и францускиот претседател Емануел Макрон изразија сочувство до жртвите и нивните најблиски.
Пред инцидентот, блискиот ски-центар Контаминес-Монтжои објави видео на социјалните мрежи на кое се гледа огромен ѕид од снег кој се спушта од планината.
Покрај четворицата загинати, во моментот на несреќата имало уште девет лица, но се уште се утврдуваат информациите за нивната состојба.
Лавината била долга 1 000 метри и широка 100 метри.
Метеоролошката служба претходно не издадла предупредување за лавина, што најверојатно се случило поради ветерот и повисоките температури.
На терен веднаш се испратени дваесетина спасувачи, пожарникари, полицајци и лекари од Итна медицинска помош, а дополнителна помош се уште пристигнува. Во потрагата учествуваат хеликоптери на цивилната заштита и полицијата и кучиња обучени да трагаат по жртви во лавини.
Одморалиштето ги повика луѓето да бидат внимателни ако излегуваат надвор од патеката – подалеку од подготвените ски патеки.
Двајца браќа загинаа во лавина на истиот глечер во 2014 година. И двајцата беа искусни планинари и беа соодветно опремени.
Извор: 360stepeni.mk
