КАРТУМ (АА) – Бројот на загинати во судирите меѓу суданската армија и паравоената група сили за брза поддршка (РСФ) порасна на 863 цивили, соопштија денес медицински претставници, јавува Анадолу.
Суданскиот лекарски синдикат истакна дека 3.531 лице се повредени во судирите што започнаа на 15 април.
Оттаму се додава дека 28 цивили го изгубиле животот во судирите меѓу воените соперници во градот Нјала, главниот град на провинцијата Јужен Дарфур, во последните денови.
Минатата недела синдикатот објави дека бројот на загинати во судирите е 850, а 3.394 лица се повредени.
Седумдневниот прекин на огнот меѓу армијата и РСФ треба да стапи на сила денес по разговорите меѓу двете конфликтни страни во Саудиска Арабија.
Во последните месеци се појавија несогласувања меѓу армијата и РСФ околу интеграцијата на паравоената група во вооружените сили, клучен услов за транзицискиот договор на Судан со политичките групи.
Судан е без функционална влада од октомври 2021 година, кога војската ја собори преодната Влада на премиерот Абдула Хамдок и прогласи вонредна состојба, потег што политичките сили го квалификуваа како „државен удар“.
Транзицискиот период на Судан, кој започна во август 2019 година по соборувањето на претседателот Омар ал-Башир, требаше да заврши со избори на почетокот на 2024 година.
Извор: www.aa.com.tr
