Бројката на загинати во земјотресите што ја потресоа Туркије се зголеми на 21.848

АНКАРА (АА) – Најмалку 21.848 лица загинаа, а 80.104 се спасени по двата силни земјотреси што во понеделникот ги потресоа јужните делови на Туркије, потврди турската Агенција за управување со катастрофи и вонредни состојби (АФАД), известува Анадолу.

АФАД информираше дека по двата разорни земјотреси со епицентри во турската област Кахраманмараш забележани се 1.666 последователни земјотреси.

Од подрачјето погодено од земјотресите во други делови на Туркије се евакуирани над 86.000 лица.

Голем број спасувачки екипи и понатаму посветено работат во акциите за претрага и спасување на луѓето заробени во урнатините на зградите.

– Разорните земјотреси што ја потресоа Туркије на 6 февруари

Два силни земјотреси, првиот со интензитет од 7,7 степени по Рихтер, во понеделникот наутро во 4:17 часот по локално време, со епицентар во округот Пазарџик, и вториот во 13:24 часот, со интензитет од 7,6 степени по Рихтер, со епицентар во местото Елбистан, ги потресоа јужните делови на Туркије. Епицентрите на земјотресите се регистрирани во турската област Кахраманмараш.

Во овие земјотреси кои силно ги потресоа и северните делови на Сирија, животот го загубија најмалку 3.300 лица, а над 5.000 се повредени.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS).