Борел: Сè укажува на тоа дека Русија стои зад рушењето на браната „Нова Каховка“

Изјавата на Борел доаѓа во ист ден кога Службата за безбедност на Украина соопшти дека поседува телефонски разговор со кој се докажува оти руска диверзантска група ја разнела браната. Телефонскиот разговор, кој Украина тврди дека го поседува, наводно се одвива меѓу двајца војници кои на руски јазик разговараат за последиците од уривањето на браната. Доказите дека браната „Нова Каховка била крената во воздух денеска добија на гласност и по објавувањето на сеизмичките податоци на Норсар, кои покажуваат дека имало експлозија на местото во вторникот во раните утрински часови

Високиот претставник на Европската Унија за надворешна политика и безбедност Жозеп Борел денеска изјавил оти сè укажува на тоа дека Русија стои зад рушењето на браната „Нова Каховка“, за што Москва и Киев меѓусебно се обвинуваат изминатите неколку дена, пишува „Гардијан“.

Браната беше уништена во вторникот, а излеаната вода од акумулацијата поплави десетици села и делови од градот Херсон принудувајќи илјадници луѓе да ги напуштат своите домови и предизвика стравувања од хуманитарна катастрофа.

Шефот на европската дипломатија Борел во изјавата за шпанската национална телевизија што ја пренесува „Гардијан“ вели:

„Браната не беше бомбардирана. Таа е уништена од експлозиви поставени во деловите каде што се наоѓаат турбините. Оваа области се под руска контрола. Не бев таму за да дознаам кој го направи тоа. Но, се чини дека сè укажува дека ако се случило во област под руска контрола, тешко е да се поверува дека тоа би можело да биде некој друг. Во секој случај, последиците за Украина се страшни, од хуманитарна гледна точка за раселените луѓе и од еколошка гледна точка, бидејќи уништувањето (на браната) ќе предизвика еколошка катастрофа“

Изјавата на Борел доаѓа во ист ден кога Службата за безбедност на Украина соопшти дека поседува телефонски разговор со кој се докажува оти руска диверзантска група ја разнела браната. Телефонскиот разговор, кој Украина тврди дека го поседува, наводно се одвива меѓу двајца војници кои на руски јазик разговараат за последиците од уривањето на браната.

 „Тие (Украинците) не го погодија. Тоа беше нашата диверзантска група. Сакаа да ги исплашат луѓето со браната, но тоа не одеше според планот – направија повеќе од она што планираа“,

наводно рекол еден од луѓето, кој Службата за безбедност на Украина го опишува како руски војник.

Доказите дека браната „Нова Каховка“ била крената во воздух денеска добија на гласност и по објавувањето на сеизмичките податоци кои покажуваат дека имало експлозија на местото во вторникот во раните утрински часови.

Норсар, норвешката сеизмичка опсерваторија, соопшти дека сигналите од регионалната станица во Романија укажуваат на експлозија која се случила во вторникот во 2:45 часот. Во соопштението на Норсар не се наведени заклучоци за тоа кој е одговорен за експлозијата.

Украинската влада соопшти дека руските сили имале контрола врз хидроелектричната инфраструктура на врвот на браната и ја користеле како гарнизон во моментот на експлозијата. Експертите за експлозиви велат дека би било многу полесно да се разнесе браната одвнатре отколку со нејзино гранатирање од далечина, наведува „Гардијан“.

Браната „Нова Каховка“ во окупираниот дел на украинската област Херсон беше уништена во вторникот, за што јужната команда на украинските сили веднаш обвини дека е одговорна Русија.

Официјална Москва, пак, негира каква било вмешаност во овој напад и обвини оти Украина направила намерна саботажа за да се одвлече вниманието од неуспешната контраофанзива која планира да ја изврши.

Уривањето на браната предизвика огромни поплави во јужниот регион Херсон што принуди евакуација на голем број луѓе од населените места. Сепак, засега не може со сигурност да се потврди кој стои зад нападот над браната.