Заменик-главниот обвинител Сарафов изјави дека целта на експлозијата била Гешев да се убие, а не да се заплаши. Во случајот нема повредени и тој вели дека само случајноста спречила смртни случаи
Бомба експлодирала покрај колоната автомобили во која бил и главниот обвинител на Бугарија, Иван Гешев. Настанот се случил денеска околу 11:45 часот на патот меѓу Самоков и селото Ковачевци додека Гешев патувал во правец кон Софија.
Неговиот заменик, Борислав Сарафов, изјави дека експлозијата се случила на место каде имало кривина на патот, па брзината на движење треба да се намали. На самото место на експлозијата бил направен кратер со длабочина од 30-40 сантиметри и дијаметар од три-четири метри. Бомбата, според Сарафов, имала тринитротолуен (ТНТ) еквивалент на три килограми, а експлозијата се случила во моментот кога на местото минувал автомобилот на Гешев.
„Целта на експлозијата била да се убие, а не да се заплаши“,
тврди Сарафов, пренесува БНТ.
На местото на настанот биле пронајдени маркерите што ги оставиле сторителите, а обвинителството отвориле предмет за тероризам. Случајот ќе го истражуваат обвинители од обвинителството во Софија.
Дел од медиумите претходно јавија дека оштетен бил еден од автомобилите кои биле во колоната односно автомобил во кој се наоѓало дел од обезбедувањето на Гешев. Меѓутоа, во изјавата Сарафов тврди дека во случајот нема повредени и оти само случајноста спречила смртни случаи.
Извор: 360stepeni.mk
