Американскиот претседател во заминување Џо Бајден ги оквалификува економските планови на неговиот наследник Доналд Трамп како „катастрофа“ во говор во кој укажа на успесите на неговата администрација.
Според Бајден, плановите на новоизбраниот претседател Доналд Трамп да воведе огромни царини и да ги намали даноците, се потег што ќе ја ослабне американската економија.
„Се молам на Бога новоизбраниот претседател да го отфрли Проектот 2025. Мислам дека тоа ќе биде економска катастрофа за нас и за регионот“, рече Бајден во Институтот Брукингс во Вашингтон.
Бајден предупреди дека плановите на Трамп во голема мера ќе им користат на богатите и ќе го сменат „напредокот“ постигнат во изминатите четири години кон зајакнување на работничката класа.
„Трамп изгледа решен да воведе високи, универзални тарифи за сите важни стоки внесени во оваа земја поради погрешното верување дека странските земји ќе ги сносат трошоците за тие тарифи, а не американскиот потрошувач“, рече Бајден.
Бајден го обвини Трамп за лошо управување за време на пандемијата и продлабочување на рецесијата и предупреди дека планот на Трамп да ја обнови серијата даночни олеснувања, што истекуваат наскоро, ќе го зголеми дефицитот или ќе резултира со намалување на благосостојбата.
Тој се осврна и на критиките на некои демократи за економската политика што ја водел во изминатите четири години, за кои некои тврдат дека довело до пораз на потпретседателката Камала Харис на изборите, укажувајќи дека за време на неговиот мандат земјата влезе во „нова фаза на економско закрепнување“ со инвестиции во индустријата и потрошувачката.
Бајден ги обвини пандемијата и руската инвазија на Украина за порастот на инфлацијата и призна дека Американците се уште се соочуваат со високи цени, но истакна дека САД го надминаа опоравувањето на пандемијата во целина подобро од која било друга развиена земја.
Извор: 24vesti.mk
