Австрија ќе ја претвори куќата во која е роден Хитлер во центар за обука за човекови права

1 min read

Реновирањето на објектот и неговата преобразба во полициска станица треба да започне оваа есен и да заврши во 2025 година. Се проценува дека пренамената ќе чини 20 милиони евра

Родната куќа на Адолф Хитлер во австрискиот град Браунау на Ин ќе биде полициска станица и образовен центар каде што идните австриски полицајци ќе бидат подучувани на темата на човековите права, објавија денеска австриските и германските медиуми.

„Уривање или музеј не доаѓа предвид. Полициска станица и едукативен центар за полициски службеници е соодветна намена која ја задоволува моралната, политичката и правната димензија на ова место“,

вели историчарот Оливер Ратколб од експертската комисија која се занимаваше со прашањето за намената на зградата во која во 1889 година бил роден идниот германски диктатор Адолф Хитлер.

Адолф Хитлер живеел таму со семејството само неколку месеци по неговото раѓање. Зградата во центарот на Браунау на Ин, која се наоѓа веднаш на границата со Германија, е во сопственост на државата од 2017 година.

Куќата му била одземена на претходниот сопственик по неколку обиди да ја откупи зградата, но безуспешно. Национализацијата на зградата, беше најавено тогаш, треба да спречи зградата да стане место за собирање на неонацистите.

Со години во зградата беше сместен социјален центар за лица со посебни потреби. Поранешниот сопственик на крајот од судскиот процес се задоволил со откупната цена од 1,5 милиони евра.

Реновирањето на објектот и неговата преобразба во полициска станица треба да започне оваа есен и да заврши во 2025 година. Се проценува дека пренамената ќе чини 20 милиони евра. Комисијата го образложи драстичното зголемување на цената од првично проценетите пет милиони до поскапувањето на градежништвото по пандемијата како и дополнителните градежни интервенции што ги бара полициската станица.

Фото: EPA/CHRISTIAN BRUNA

Извор: 360stepeni.mk

Претходно

САД ја одобрија продажбата на системот за воздушна одбрана за Украина во вредност од 285 милиони долари

Следно

Иниеста повторно во дресот на Барселона?

Latest from Blog