АНТАЛИЈА (АА) – Во близина на брегот на областа Анталија потона трговски брод што во турските води пловел под странско знаме. Во несреќата животот го загубија три лица, известува Анадолу.
Гувернерот на Анталија, Ерсин Јазиџи, изјави дека тимовите за пребарување и спасување на Командата на крајбрежната стража биле упатени во подрачјето каде што трговскиот брод „Joe 2“, кој пловел под странско знаме, потонал во близина на брегот на местото Кумлуча.
Јазиџи информираше дека од 14 члена на екипажот од бродот што бил натоварен со алуминиум, двајца членови на екипажот биле извлечени од морето со хеликоптер на крајбрежната стража и пренесени во Државната болница Финике, а други тројца припадници на бродскиот персонал биле спасени од други трговски бродови што се наоѓале во околината.
Гувернерот Јазиџи соопшти дека во тек се активностите за пребарување и спасување на девет лица.
Во соопштението што го објави Командата на турската крајбрежна стража се вели дека по добиената информација во 03:47 часот дека пред потонување е трговски брод со знаме на Гвинеја-Бисао, кој пловел од Искендерун кон пристаништето Измаил во Украина, бил упатен општ итен повик до сите бродови во регионот, а на местото на настанот се пратени една корвета, седум чамци, два хеликоптера и еден авион, сите на крајбрежната стража.
Активностите за пребарување и спасување биле поддржани од две фрегати и два хеликоптера поврзани со Командата на поморските сили. Сите членови на екипажот на трговскиот брод биле сириски државјани. Главниот јавен обвинител на местото Кумлуча поведе истрага во врска со несреќата.
Извор: www.aa.com.tr
