Еколошката активистка Матија (19), која учествуваше во акцијата кај фонтаната, рече дека страшната трагедија што се случи во Емилија-Ромања во последните денови е предупредување кое навестува мрачна иднина што го чека човештвото
Активисти за заштита на животната средина денеска ја поцрнија водата во познатата римска фонтана „Треви“ тврдејќи дека смртта на 14 лица во поплавите во Италија е предупредување за климатските промени.
Активистите на организацијата „Последна генерација“ (The Last Generation), која спроведува акции со кои се осудува отсуството на одговор од владата на климатските промени, се качија на фонтаната и истурија црна растителна течност во водата. Тие се симнаа од фонтаната во придружба на полицијата.
Повеќе од 36 000 луѓе се раселени поради поплавите што го погодија регионот Емилија-Ромања. Во областа дождот предизвика огромни поплави во богатата земјоделска и туристичка област.
Еколошката активистка Матија (19), која учествуваше во акцијата кај фонтаната, рече дека страшната трагедија што се случи во Емилија-Ромања во последните денови е предупредување кое навестува мрачна иднина што го чека човештвото.
Групата „Последната генерација“ започна со акции во Италија во 2022 година пред општите избори за да ги повика лидерите на сите политички партии да им дадат приоритет на климатските вонредни состојби.
Активистите на групата спроведуваа акции низ цела Европа. Тие фрлаа супа, пире и бои на заштитното стакло од сликите изложени во големите музеи и други културни институции.
Фото: EPA-EFE/GIULIA MARRAZZO
Извор: 360stepeni.mk
