Европската комисија бара од Црна Гора да им ги одземе црногорските државјанства на лицата кои се предмет на меѓународни рестриктивни мерки, дадени врз основа на неодамна откажаната шема за доделување државјанства на инвеститори, јавија црногорските медиуми.
Во Извештајот во рамките на механизмот за суспензија на визниот режим, кој Европската комисија го објави кон крајот на минатата недела, се очекува Црна Гора да побара сите преостанати барања поврзани со споменатата шема за доделување државјанства на инвеститори да бидат разгледани и процесуирани во согласност со највисоки можни безбедносни стандарди.
Во делот од извештајот кој се однесува на шемата „златни пасоши“, односно државјанство во замена за инвестиции, се посочува дека продолжи обработката на барањата поднесени пред крајниот датум, односно 31 декември 2022 година.
Во 2023 година, Црна Гора обработила 423 барања (за 423 апликанти и 927 членови на семејства) и додели државјанство на 701 лице.
-Од овие 701 лице, 396 имаат државјанство на Руската Федерација, а 65 на Народна Република Кина. Државјанството се доделува на лица кои имаат државјанство на други трети земји за кои е потребна виза (Јужна Африка, Турција, Либан, Пакистан, Индија, Белорусија, Филипини, Индонезија, Камбоџа, Казахстан, Малезија, Нигерија, Саудиска Арабија, Тунис, Узбекистан), се наведува во документот на ЕК.
Комисијата потсетува дека Црна Гора објави дека за сите лица за кои подоцна се утврди дека добиле црногорско државјанство и кои се на списокот на лица подложени на меѓународни рестриктивни мерки, Владата се обврза да покрене постапка за губење на црногорското државјанство со сила на закон.
-Комисијата ќе продолжи да ги следи сите случувања во овој поглед додека не се обработат сите барања кои чекаат, се вели во Извештајот за механизмот за суспензија на визниот режим.
Се наведува, меѓу другото, дека е потребен дополнителен напредок во усогласувањето на визната политика на Црна Гора со листата на земји од ЕУ за кои е потребна виза, објави РТЦГ.
Извор: kurir.mk
