Историскиот проект за снабдување со вода за пиење во Љуботен и Љубанци напредува со одлична динамика, што бележи важен чекор за подобрување на животот на жителите од овие населени места.
Градоначалникот на општина Бутел Дарко Костовски информираше дека денеска на една од седниците на Град Скопје била одобрена одлуката за воспоставување меѓуопштинска соработка меѓу општина Бутел и Град Скопје. Со оваа одлука, поддржана со мнозинство гласови, се гарантира поврзување на водоводната мрежа на град Скопје со новата водоводна мрежа за Љуботен и Љубанци.
„Историскиот проект за вода во Љубанци и Љуботен напредува со одлична динамика! Денеска на седница на Град Скопје со мнозинство гласови ЗА, се усвои одлука за воспоставување на меѓу општинска соработка помеѓу Општина Бутел и Град Скопје. Станува збор за одлука со која се гарантира приклучок на градскиот водовод со ново предвидената водоводна мрежа за Љубанци и Љуботен. Првата фаза од овој историски проект ќе биде финансирана од страна на амбасадата на САД, во вредност од 800.000 долари. Останатите две фази од проектот ќе бидат финансирани од страна на владата на Р. Македонија и Општина Бутел. Проектната документација беше изработена од страна на Општина Бутел во вредност од 5 милиони денари“, напиша градоначалникот на Бутел, Дарко Костовски на својата официјална Фејсбук страница.
Градоначалникот на општина Бутел, Дарко Костовски, ја истакна важноста на овој проект, кој се заложи за еднаков развој во сите делови на општината што ја води.
„Ова е само почеток. Приоритет ни е развојот на руралните средини, бидејќи сите граѓани заслужуваат еднакви услови за живот и модерна инфраструктура“, напиша понатаму Костовски.
Според Костовски, овој историски проект не само што решава долгорочен проблем со снабдувањето со вода за пиење, туку ја зајакнува соработката меѓу институциите и носи долгорочни придобивки за жителите на Љуботен и Љубанци.
