Во Центарот за култура – Битола е отворена изложбата „Фото колонија Пелагонија“. Изложбата е завршна активност во рамки на проектот со истиот наслов, кој што втора година по ред го имплементира Центарот за европски развој и интеграција од Битола. Оваа групна изложба е составена од 26 фотографии кои ги изработија 12 фотографи. На фотографиите се претставени 12 објекти од Битола и 1 од Крушево со по две фотографии.
Главната едукативна креативна фаза на проектот ФОТОКОЛОНИЈА ПЕЛАГОНИЈА 2024 се реализираше во месец јуни 2024 , кога Роберт Јанкулоски и Мери Бошкоска, двајца ветерани и мајстори на фотографијата, одвоија по еден ден и го поминаа во заедничка кретивна работа и размена на искуства и совети со група на 15-тина фотографи кои беа дел од проектот.
Гостин предавач на обуката беше и историчарот Васко Гичевски, кој со учесниците зборуваше за значењето на објектите и приказната зад објектите која малкумина од учесниците на проектот ја знаеа.
„Проектот Фотоколонија Пелагонија е обид преку креативна фотографски пристап да се создадат сведоштва во облик на електронски фотографии за објектите кои се дел од материјалното културно наследство. Преку проектот се врши документирање на објектите во нивната сегашна состојба а фотографиите во иднина ќе бидат интегрирани во интерактивните апликации за презентирање на културното богатство на нашата земја“, истакна Диоген Хаџи Коста Милевски извршен директор на ЦЕРИ и координатор на проектот ФОТОКОЛОНИЈА ПЕЛАГОНИАЈ.
Во рамките на свеченото отворање на дел од учесниците во проектот им беа врачени дипломите за успешното завршување на сите фази од реализацијата на проектот, а на менторитие и партнерите во проектот и беа врачени благодарници за поддршката и персоналниот придонес без кој немаше да биде можна реализацијата на овој проект
„Вечерва уште еднаш се потсетив колку е убав нашиот град. Многу често поминуваме покрај многу познати згради во нашиот град и ги одминуваме затоа што нашето око се навикнало да ги прима како нешто нормално. Ние имаме град кој што потсеќа на било кој град од европските метрополи каде што патуваме и правиме илјадници фотографии а многу често забораваме колку ни е е убава Битола и колку убавина и историја се крие во старите градби.“ – потенцираше Маја Андоновска – Илијевски, директор на Центарот за култура – Битола.
Проектот е финансиран од Министерството за култура на Република Северна Македонија, а партнери на проектот се Центарот за култура – Битола и БВ Бизнис груп.
Сите љубители на фотографијата ќе имаат можност да ги погледнат фотографиите од оваа изложба до 26.11.2024 во фоајето на НУ Центар за култура Битола. По завршување на изложбената фаза фотографиите ќе бидат достапни на интернет страницата на Центарот за европски развој и итеграција – www.cedi.mk
ИЗВОР: racin.mk
