Владата не се откажува од зголемувањето на платите на функционерите за 78%, но ќе работи во иднина тие да не се покачат повторно. Со новата пресметка, на функционерите од јануари им следува ново зголемување кое варира од 130 до 330 евра.
„Едно е сигурно, покрај една работа дека еден ден ќе заминеме сите од овој свет, е дека од догодина нема да има зголемување на платите на функционерите“, вели Христијан Мицкоски.
Засега е неизвесно дали тоа ќе се случи преку законски измени во Собранието.
„Како? Најверојатно ќе биде со корекција на коефициентите“, додава Христијан Мицкоски.
Од друга страна, опозициската СДСМ обвини дека опозиционерот Мицкоски не го познавал Мицкоски кој е на власт.
„Во интервју за Сител Телевизија на 17.08.2023 година, Мицкоски ќе вети пред граѓаните дека ќе ги ревидира и ќе ги намали платите на фунционерите доколку граѓаните му ја дадат довербата, за што ќе предложат и конкретен закон. Еве Мицкоски е премиер, поминаа 4 месеци како ја предводи Владата, нема ниту збор за ветеното намалување и ревизија на платите на функционерите“, велат од СДСМ.
Од ВМРО-ДПМНЕ претходно истакнаа дека нивна цел е да се подобри животниот стандард и на прашањето дали ќе го поништат зголемувањето одговорија дека работат да нема толкави разлики во платите какви што ги има. Инаку, Уставниот суд лани укина два члена од Законот за плата и надоместоци на функционерите и со тоа отвори пат за зголемување на платите на над 1000 функционери за дури 78 отсто. Министерската плата стигна до 115 илјади денари, а просечната плата во земјава изнесува околу 41 илјада.
ИЗВОР: ТВ 21
