Како што беше најавено од Министерството за внатрешни работи (МВР), улицата „Самуилова“, која води до црквата „Св. Спас“, од вечерва е блокирана за сообраќај
Блокирањето на улицата, заедно со полициското обезбедување на црквата во чиј круг почива револуционерот Гоце Делчев, е дел од засиленото полициско обезбедување во пресрет на одбележувањето на годишнината од раѓањето на великанот
Улицата „Самуилова“, во подножјето на Скопското кале, од вечерва е блокирана за сообраќај.
Оваа улица, која води до црквата „Св. Спас“ во Старата скопска чаршија, а во чиј круг се наоѓа гробот на Гоце Делчев, до попладнево беше проодна, но при обиколката што претходно денеска ја направи екипата на „360 степени“ евидентно беше оти таа ќе биде затворена за сообраќај подоцна во текот на денот.
Дека улицата од попладнево ќе биде затворена, денеска потврдија и од Министерството за внатрешни работи.
Според најавите на Министерството, од денеска, на два дена пред одбележувањето на годишнината од раѓањето на Гоце Делчев, улицата „Самуилова“, која се наоѓа пред црквата „Св. Спас“, ќе биде блокирана на потегот од улицата „Иљо Војвода“ до крстосницата со „Прохор Пчињски“.
В сабота, пак, по улиците „Лазар Личеновски“ и „Самуилова“ ќе се вози само под посебен сообраќаен режим.
Блокирањето на улицата, заедно со полициското обезбедување на црквата во чиј круг почива револуционерот Гоце Делчев, е дел од засиленото полициско обезбедување во пресрет на одбележувањето на годишнината од раѓањето на великанот.
ИЗВОР: 360stepeni.mk
