реклама
ДУИ и Алијанса за Албанците (АА) продолжуваат да разговараат за можна соработка за следните парламентарни избори. Средбите ги реализираат самите лидери на партиите. Последната средба се одржа вчера во објектот на Општина Гостивар каде Таравари го пречека Ахмети.
„Напорите се прават за најдобрата опција, за доброто и на државата но и на граѓаните“, вели Али Ахмети.
реклама
Ахмети не кажа дали конечно е постигнат договор за соработка, туку рече дека средбите ќе продолжат.
„Опциите се отворени, беше многу пријателски разговор, повторно ќе се сретнеме. Ќе видиме, ќе разговараме за опциите, визијата, настаните. Во рамките на оценките што ќе ги дадат раководните органи во нашите партии, ќе донесеме одлука како и за која опција ќе се одредиме“, вели Али Ахмети.
реклама
Таравари вели дека имало и други средби, дури не само со ДУИ туку и со опозицијата.
„Ние за коалиција сме разговарале и со Ковачевски и со Ахмети и со албанските опозициски партии, со сите имаме преговори. Нема партија со која не разговараме“, порача Арбен Таравари.
реклама
Според Таравари, за АА е многу тешко да оди на избори заедно со ДУИ, сепак има едно „НО“.
„Реков, за Алијанса е многу тешко да излезе со ДУИ, но повторно ќе ја разгледаме таа можност, секако дека ќе се почитуваат одлуките на партиските органи“, вели Арбен Таравари.
Прашани колку се блиску до соработка со Алијансата за Албанците, од ЕСП велат дека останува отворена понудата за партијата предводена од Таравари да се обедини со опозицијата.
„Имаме добра комуникација со претседателот на АА и тој и неговата партија имаат отворена можност за да се приклучат во Сојузот. Засега немаме официјален одговор за ставот на АА кон оваа понуда и затоа не сакаме да ја прејудицираме нивната одлука“, велат од ЕСП.
А за претседателот на СДСМ, Димитар Ковачевски, едно нешто е сигурно, во овие избори ќе има два блока.
Инаку парламентарните избори веќе се закажани за 8 мај 2024.
реклама
