СКОПЈЕ (АА) – По повод 28 Ноември, Денот на албанското знаме, вчера во Скопје се одржа Свечена академија под покровителство на Али Ахмети, претседателот на Демократската унија за интеграција (ДУИ), јавува Анадолу.
На овој настан присуствуваа претставници од централната и локалната власт, пратеници, академски и верски лидери, како и голем број граѓани.
Присутен беше и амбасадорот на Албанија во Скопје, Фатос Река, кој во својот говор ги поздрави политичките достигнувања на Албанците во Северна Македонија, како и нивните достигнувањата во другите сфери. Тој ги поздрави и добрите односи меѓу Албанија и Северна Македонија, додавајќи дека тие постојано се консолидираат.
„Во контекст на моментот во кој живееме, императив е Албанија и Северна Македонија да ги исполнат сите обврски што ги бара Европската Унија за што поскоро да станат дел од ова семејство“, рече амбасадорот Река.
Пред присутните се обрати и првиот вицепремиер на Владата на Северна Македонија, Артан Груби, кој упати честитки по повод празникот.
Тој рече дека Албанците никогаш порано не биле подобро, но нагласи дека „историјата не учи и дека добрите околностите се рушат за миг“.
„Нацијата, драги сестри и браќа, е почестена со работа. Ние што сме тука, должност ни е да продолжиме да ја градиме нацијата, секој од нас по еден камен во нашата тврдина, преку изградбата на автопати и железници со Албанија и Косово, отстранување на границите меѓу нас, па се до соединување во Европа. Секој посветено нека си ја врши својата работа“, рече Груби.
Свој обраќање имаше и лидерот на ДУИ, Али Ахмети, кој потсети на пожртвуваноста на албанскиот народ низ историјата. Тој зборуваше и за прогонот на Албанците кои живееле во поранешна Југославија, нагласувајќи дека Косово сега е независна држава, додека Албанците се државотворен народ во Северна Македонија.
“Орелот знае високо да лета. Орловските крилја никогаш не се уморуваат, па и овој орел како што нѐ водеше во војна, ќе нѐ води и во мир, кон Брисел“, рече Ахмети.
