АНКАРА (АА) – Во израелските напади на Газа од 7. октомври досега се убиени повеќе од 12.000 Палестинци, соопшти вчера владината Канцеларија за медиуми во опколената палестинска енклава, известува Анадолу.
Меѓу жртвите повеќе од 5.000 се деца, а 3.300 се жени, додека 30.000 лица се ранети, соопшти канцеларија за медиуми.
Во соопштението се наведува дека 3.750 луѓе се водат за исчезнати, од кои, 1.800 се деца.
„Израелската окупација изврши 1.270 масакри“, соопшти канцеларијата за медиуми.
Во израелските бомбардирања животот го загубија и 200 медицински лица, 22 припадници на цивилната одбрана и 51 новинар.
„Израелската агресија исфрли од употреба 25 од 52 здравствени центри, додека цел на нападите на израелските сили беа и 55 возила на итната помош“, се вели во соопштението.
Израел спроведува немилосрдни воздушни и копнени напади на Појасот Газа со неселективно бомбардирање на цивилни населби, станбени објекти, џамии, цркви и болници по неочекуваниот напад од страна на Хамас на 7. октомври.
Илјадници згради, вклучувајќи болници, џамии и цркви, се оштетени или уништени во израелските напади.
