Пригожин објави дека единиците на „Вагнер“ се повлекуваат од Бахмут: Ќе се заменат со редовните руски трупи

Шефот на руската платеничка група во своето видеообраќање посочил дека неговите сили се подготвени повторно да се вратат во Бахмут доколку редовната руска армија не може да управува со ситуацијата

Руската платеничка милитантна група „Вагнер“ почна да ги повлекува своите сили од украинскиот град Бахмут и да ги предава своите позиции на редовните руски трупи, објави денеска нејзиниот основач Евгениј Пригожин.

„Ги повлекуваме нашите единици од Бахмут. Од денеска од пет часот на 25 мај до 1 јуни, повеќето единици ќе бидат прераспоредени во задните кампови. Ги предаваме нашите позиции на руската армија“,

рече тој во видеообраќање објавено на Телеграм.

Ројтерс пишува дека видеото во кое се обраќа Пригожин е објавено на апликацијата Телеграм од страна на неговата прес-служба, а на него се гледа како шефот на „Вагнер“, облечен во борбена опрема, стои до станбен блок оштетен од воените напади.

Во обраќањето тој посочил дека неговите сили се подготвени повторно да се вратат во Бахмут доколку редовната руска армија не може да управува со ситуацијата.

Во саботата, руските сили објавија дека по неколкумесечни тешки борби целосно го зазеле Бахмут.

Украина, пак, го негира ова и вели дека нејзината армија напреднала во северниот и во јужниот дел на уништениот град и дека се надеваат оти ќе го опколат.

• (ВИДЕО) Пригожин тврди дека го зазеле Бахмут, украинската војска вели дека се водат жестоки борби