Синан Оган најави поддршка за Ердоган во вториот круг од претседателските избори во Турција

Оган, поранешен академик, на претседателските избори беше кандидат на сојузот на десничарските партии предводени од Партијата на победата, која е позната по своите антиимиграциски ставови во Турција. На првиот круг од претседателските избори тој освои само 5,2 отсто од вкупниот број на гласови

Педесет и петгодишниот Синан Оган, кој го освои третото место по добиени гласови на претседателските избори во Турција, најави поддршка за актуелниот претседател Реџеп Таип Ердоган во вториот круг од изборите што ќе се одржи на 28 мај, јави Ројтерс.

„По нашите внатрешни дискусии, сакам да објавам дека ќе го поддржам господинот Реџеп Таип Ердоган во вториот круг. Ги повикувам и моите гласачи да го поддржат господинот Ердоган“,

рече Оган на денешната прес-конференција.

Националистичкиот кандидат ја објави својата одлука неколку дена пред вториот круг од изборите на кои Турците ќе одлучат дали Ердоган или лидерот на опозицијата Кемал Киличдароглу ќе ја водат земјата во следните пет години.

Во првиот круг од изборите кои се одржаа на 14 мај, Ердоган освои 49,5 отсто од гласовите и за малку не победи во првиот круг, а Киличдароглу, кандидатот на шестпартискиот опозициски сојуз освои 44,8 отсто од гласовите.

• Ердоган во предност, но недоволна – Турција оди во втор круг на изборите

Оган, поранешен академик, беше кандидат на сојузот на десничарските партии предводени од Партијата на победата, која е позната по своите антиимиграциски ставови во Турција. На првиот круг од претседателските избори тој освои најмалку гласови – 5,2 отсто.

• Ердоган почна да го подготвува теренот за вториот круг на изборите: Денеска се сретна со кандидатот на Алијансата Ата