КАЗАН (АА) – Во Казан, главниот град на Татарстан при Руската Федерација, започна 14. Форум „Русија-исламски свет: Форум во Казан 2023“ на кој учествуваат економски претставници на исламските земји и Русија, јавува Анадолу.
Агенција Анадолу е глобален комуникациски партнер на овој форум.
Овој форум има цел зајакнување на комерцијалните, економските, научните, техничките, социјалните и културолошките врски помеѓу Русија и земјите членки на Организацијата за исламска соработка (ОИС).
Меѓу целите на овој Форум се и ширење на исламските финансии и халал индустријата во Русија, отворање нови пазари и откривање на економските можности.
На Форумот, кој годинава се одржува по 14-ти пат, учествуваат меѓународни организации, претставници на јавни и финансиски институции, дипломати, политичари, инвеститори и бизнисмени, а се очекува да учествуваат повеќе од 7.000 учесници од 86 земји.
Во рамките на Форумот ќе се организираат околу 200 активности, вклучително и 140 тематски состаноци.
На првиот ден од Форумот ќе се одржат сесии на теми „Исламски финансии – Основи на исламското банкарство и финансии“, „Русија-исламски свет: медиумска соработка со цел одржлив развој и економска благосостојба“, „Сертификација на халал производи и меѓународно искуство“, „Примена на вештачката интелигенција во деловниот живот“ и „Научна и технолошка соработка во насока на ефикасно користење на ресурсите“.
Овој Форум за бизнисмените учесници овозможува наоѓање трговски, финансиски и технолошки партнери, како и влез на нови пазари и привлекување инвестиции.
Во овие рамки ќе се организираат бизнис-саемот „Русија Халал Експо“ и „Русија Халал Маркет“ на кои, покрај халал производи и услуги, ќе бидат презентирани и проекти за инвестиции и инфраструктура. Исто така, ќе се организира и дефиле за конзервативна облека „Модест Фешн Деј“.
Извор: www.aa.com.tr
