Погледнете го новото издание на емисијата „360 степени“, емитувано на 12 мај 2023 г. на ТВ Алсат, во кое гостуваа универзитетските професори Јасна Бачовска Недиќ и Огнен Спасовски
Замислете се во ситуација да ве запре сообраќајна полиција по направен прекршок, што прво би направиле? Ова беше едно од прашањата во истражувањето на јавното мислење на тема „ситна корупција“ што за потребите на „360 степени“ го спроведе „Тим институт“. При анализа на одговорите преку возраста на испитаниците, воочливи се разлики меѓу најмладите и највозрасните. 51,5 отсто од оние на возраст од 18 до 34 години рекле дека ќе ја замолат полициската патрола да им прости. Од оние над 55 години, таков одговор дале 40 отсто. Дека прифаќаат оти направиле прекршок и ќе ја платат казната одговориле 28 отсто од најмладата категорија. Од највозрасните – така рекле десет процентни поени повеќе или 38 отсто. Слична разлика се воочува и кај одговорот – итно барате пријател за да ѝ се јави и да побара од патролата да не ве казнува. Тоа би го направиле 18,1 отсто од најмладите наспроти 10,4 отсто од највозрасните во истражувањето. Кои се причините за ваквите разлики дебатираме со Јасна Бачовска Недиќ – професорка по социологија на правото на „Јустинијан Први“ при УКИМ, и Огнен Спасовски – професор на Институтот по психологија на Филозофскиот факултет при УКИМ.
ИЗВОР: 360stepeni.mk
