Ердоган го осуди израелскиот напад: Џамијата „Ал Акса“ е нашата црвена линија

АНКАРА (АА) – Претседателот на Република Туркије, Реџеп Таип Ердоган, остро го осуди израелскиот напад врз џамијата „Ал Акса“ во окупираниот Источен Ал Кудс/Ерусалим и додаде дека чувствува тага и гнев, јавува Анадолу.

„Туркије не може да молчи пред нападите. Нападот на џамијата ‘Ал Акса’ и газењето на светоста на Харам ал Шариф е нашата црвена линија“, рече Ердоган по ифтарот со пензионерите во главниот град Анкара.

Неговите изјави следуваа откако ескалираа тензии по приведувањето на околу 350 верници од страна на израелската полиција од комплексот на џамијата „Ал Акса“.

Група Палестинци се забарикадираа во молитвената сала „Ал-Кибли“ во комплексот на џамијата „Ал Акса“ откако еврејските доселеници повикаа на напад врз џамијата.

Опколувајќи ја молитвената сала „Ал-Кибли“, израелската полиција се качи на покривот на џамијата, ги скрши прозорците и употреби звучни бомби врз верниците што беа внатре.

„Ги осудувам подлите постапки против првата кибла на муслиманите и повикувам нападите да запрат што е можно поскоро“, рече Ердоган.

Истакнувајќи дека Израел ја следи политиката на угнетување, Ердоган порача дека палестинскиот народ не е сам.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS).