Столтенберг: Финска утре се приклучува на НАТО, и Украина ќе стане членка на Алијансата

Процесот на ратификација во 30-те земји членки на НАТО беше завршен на 31 март со одобрението на турскиот парламент за пристапување на Финска, која поднесе барање за членство во НАТО во мај 2022 година

Генералниот секретар на НАТО, Јенс Столтенберг, изјави дека утре ќе биде поставено знамето на Финска пред седиштето на Алијансата во Брисел.

Финска утре ќе стане 31. членка на НАТО.

„Утре ќе ја пречекаме Финска како 31. членка. Утрешното приклучување на Финска во НАТО ќе биде добар ден за финската безбедност, нордиската безбедност и за НАТО како целина. Исто така е добро и за Шведска. Ставот на НАТО за кандидатурата на Украина останува непроменет – Украина ќе стане членка на Алијансата“,

изјави Столтенберг во пресрет на средбата на министрите за надворешни работи на НАТО во Брисел.

Исклучително е важно да покажеме дека вратите на НАТО се отворени, што ќе го направиме утре, кога Финска ќе стане полноправна членка, додаде шефот на НАТО.

„Тоа ќе го демонстрираме и кога процесот на пристапување на Шведска ќе биде финализиран, се надеваме дека во блиска иднина“,

рече Столтенберг.

Процесот на ратификација во 30-те земји членки на НАТО беше завршен на 31 март со одобрението на турскиот парламент за пристапување на Финска, која поднесе барање за членство во НАТО во мај 2022 година.