Пензиониран генерал и поранешен премиер водат на изборите за нов чешки претседател

Пензионираниот генерал Петр Павел, кој се кандидира како независен кандидат, води на две од четирите конечни изборни анкети, додека поранешниот премиер Андреј Бабиш, милијардер кој ја предводи најголемата опозициска партија во парламентот, води на другите две анкети

Пензионираниот чешки генерал Петр Павел (61), кој беше на висока функција во НАТО и поранешниот премиер Андреј Бабиш (68) на претседателските избори во Чешка кои се почнуваат денеска влегуваат како фаворити пред преостанатите шест кандидати.

Претседателот во Чешка нема секојдневни извршни овластувања туку тој ги назначува премиерот, шефот на централната банка и судиите и има право на глас во надворешните работи.

Пензионираниот генерал Петр Павел, кој се кандидира како независен кандидат, води на две од четирите конечни изборни анкети, додека поранешниот премиер Андреј Бабиш, милијардер кој ја предводи најголемата опозициска партија во парламентот, води на другите две анкети.

Но, посебна анкета го фаворизира Павел во веројатно вториот круг пред Бабиш, кој ја оформи својата изборна стратегија како протест против централно-десничарската влада, обвинувајќи ја дека прави премалку за да им помогне на луѓето да се справат со огромните животни трошоци.

Ниту еден кандидат не може да освои повеќе од 50 отсто во првиот круг на гласање, кој завршува в сабота, покажуваат анкетите, а најверојатно ќе следи вториот круг меѓу првите двајца кандидати за две недели.

Иако има осум кандидати, само Павел, Бабиш и професорката по економија Дануше Нерудова (44) имаат шанса да поминат во вториот круг, покажуваат анкетите. Во вториот круг, пак, анкетите му даваат предност на Павел пред Бабиш. Нерудова е трета во анкетите.

Актуелен претседател на Чешка е Милош Земан, кој најголем дел од своите два петгодишни мандати ги помина во обид да изгради поблиски односи со Кина и Русија.

Пријател на унгарскиот лидер Виктор Орбан, Бабиш во вторникот го посети францускиот претседател Емануел Макрон за да ги покаже своите врски во Европа.

Павел, од друга страна, се огради од Орбан, кој се судри со партнерите во ЕУ за владеење на правото и ја доведе во прашање целта на Вишеградската група, во која се и Полска и Словачка.

„Кога денес толку многу се разликуваме по фундаменталните прашања, прашањето е дали треба да го напуштиме тој формат“,

рече Павел на дебатата во средата.

Павел има воено образование од советско време, но и од Западот, а служеше во мировна мисија во поранешна Југославија во 1990-тите и беше на чело на воениот комитет на НАТО во 2015-2018 година кој го советува генералниот секретар на федерацијата.

Павел и Нерудова во предизборната кампања зборуваа за прифаќање на еврото и традицијата на надворешната политика на Хавел, водена од човековите права.

Додека беше на власт од 2017 до 2021 година, Бабиш се судри со Европската комисија околу субвенциите исплатени на неговата деловна империја „Агроферт“. Тој беше ослободен оваа недела во случај на измама со субвенции од ЕУ.

Меѓу главните претседателски кандидати, Бабиш е „најмлак“ во поддршката за Украина, но и онака таа политика е во рацете на владата, која е еден од најверните поддржувачи на Киев.